ساحل آن لائن یو ٹیوب چینل نے پانچ لاکھ سبسکرائب کو کیا کراس؛ چیرمین ایس ایم سید خلیل نے کہا؛ یہ ایک ھدف نہیں بلکہ سنگ میل ہے
بھٹکل 5 ستمبر (ایس او نیوز) ساحلی کرناٹکا کی مکمل خبروں سمیت ریاستی ، ملکی اور عالمی خبروں کی نشریات پیش کرنے کے ساتھ ساتھ گذشتہ پانچ سال سے بھی کم مدت میں شروع کی گئی یوٹیوب پر وڈیو نیوز کو لوگوں نے اتنا پسند کیا کہ قلیل عرصہ میں ہی یو ٹیوب چینل کے سبسکرائبر کی تعداد پانچ لاکھ کو کراس کرگئی ہے۔
نہایت مسرت کا اظہار کرتے ہوئے ساحل میڈیا اینڈ پبلیشنگ سوسائٹی کے چیرمین جناب ایس ایم سید خلیل الرحمن نے بتایا کہ الحمد اللہ، اللہ کی مدد اور توفیق سے ساحل آن لائن نے سچائی کا آئینہ بننے کا جو بیڑا اُٹھایا تھا اور دین کی سر بلندی، قوم کی فلاح اور ملت کی میڈیا میں نمائندگی کی جن اُمیدوں کو لے کر آگے بڑھا تھا، آج اُسی سفر کے ایک سنگ میل کو ہم نے کامیابی کے ساتھ طے کردیا ہے۔
انہوں نے کہا کہ ساحل آن لائن پوری ساحلی پٹی کا واحد نیوز ادارہ ہے جو بیک وقت انگریزی، کنڑا اور اُردو میں تسلسل کے ساتھ خبریں شائع کرتا ہے اور جس کی شائع کردہ خبریں، مضامین اور ویڈیوز لاکھوں افراد تک پہنچتی ہیں۔
جناب ایس ایم سید خلیل الرحمن نے کہا کہ اس پُر مسرت موقع پر ہم سب سے پہلے بارگاہ ایزدی میں سر بہ سجود ہیں کہ ہزاروں رکاوٹوں، سازشوں اور دھمکیوں کے باوجود اُس نے ہمیں سچائی کے راستے پر قائم رکھا۔ ہم اپنے ناظرین اور قارئین کے بھی دل سے مشکور ہیں کہ اُنہوں نے ہمیشہ ہمارا ساتھ دیا، سچائی کو پھیلانے کے سفر میں ہمارے معاون رہے اور ہماری ہمت افرائی کی۔
جناب سید خلیل نے کہا کہ پانچ لاکھ کا یہ عدد ہمارے لئے ہدف نہیں بلکہ سنگ میل ہے۔ اللہ کی توفیق، اُس کی نصرت اور نگہبانی کے سائے تلے، سچائی کو پھیلانے کے اس سفر میں ہم مزید جفاکشی اور محنت کے ساتھ آگے بڑھیں گے ان شاءاللہ۔
انہوں نے تمام لوگوں سے دوبارہ شکریہ ادا کرتے ہوئے گذارش کی کہ ساحل آن لائن کی پوری ٹیم کو اپنی قیمتی دعاؤں میں یاد رکھیں۔ انہوں نے اس بات کی بھی درخواست کی کہ ساحل آن لائن کی آواز کو مزید مضبوط کرنے اور حق گوئی میں تعاون کرنے کیلئے ساحل آن لائن کے چینل کو خود بھی سبسکرائب کریں اور کم از کم پانچ دوست یا احباب کو بھی اس پر آمادہ کریں۔
خیال رہے کہ ساحل آن لائن کا یو ٹیوب چینل اس اڈرس پر دستیاب ہے:
