بھٹکل 23 اپریل (ایس او نیوز) بھٹکل کے معروف اور مایہ ناز بلے بازاور کوسموس اسپورٹس سینٹر کے سابق کپتان ارشد گنگاولی کے فرزند ارمان گنگاولی کو ابوظبی انڈر۔ 16 کرکٹ ٹیم میں شامل کیا گیا ہے جو جلد منعقد ہونے والے انڈر 16انٹر ایمریٹس کرکٹ ٹورنامنٹ میں اپنے کھیل کا مظاہرہ کریں گے۔
ساحل آن لائن سے فون پر گفتگو کرتے ہوئے ٹیم مینجر انڈریو رسّل نے بتایا کہ ٹیم میں یواے ای میں رہائش پذیر کھلاڑیوں کو اُن کی پرفارمینس کی بنیاد پر منتخب کیا جاتا ہے، ٹیم میں انڈیا، پاکستان، سری لنکا و دیگر ممالک کے کھلاڑی شامل ہیں، جس میں ارمان بھی ایک ہیں۔ انہوں نے بتایا کہ ارمان کو اُن کی بہترین آل راونڈ کارکردگی کی بنیاد پر ٹیم میں شامل کیا گیا ہے، وہ اچھے بلے باز ہونے کے ساتھ ساتھ کافی اچھی باولنگ بھی کرتے ہیں۔
گلوبل اندین انٹرنیشنل اسکول ابوظبی میں آٹھویں درجہ میں زیر تعلیم 13 سالہ ارمان اولکانو کرکٹ اکیڈمی سے منسلک ہیں،جہاں سے انہیں آگے بڑھنے اور ابوظبی کی ٹیم میں نمائندگی کرنے کا موقع ملا۔ ان کے انتخاب پر بھٹکل کے اسپورٹس سینٹروں کے ذمہ داران نے نہایت مسرت کا اظہار کیا ہے۔ کوسموس اسپورٹس سینٹر کے ذمہ داران کےساتھ ساتھ بھٹکل مسلم یوتھ فیڈریشن کے صدر عزیز الرحمن رکن الدین ندوی نے ارمان سمیت ان کے والد کو اس اہم کامیابی پر مبارکباد پیش کی ہے۔