بھٹکل مسلم اسوسی ایشن ریاض کا اہم فیصلہ؛ ووٹنگ کے لئے بھٹکل جانے والے جماعت کے ممبران کو فری ٹکٹ کا اعلان
ریاض 26/اپریل (حبیب اللہ محتشم/ ایس اونیوز) فسطائی طاقتوں کو برسر اقتدار پر آنے سے روکنے اورملک میں جمہوری اقدار کو باقی رکھنے کے مقصد سے بھٹکل مسلم اسوسی ایشن ریاض نے محسوس کیا ہے کہ اِس بار کے انتخابات میں مسلمانوں کی طرف سے صد فیصد ووٹنگ ضروری ہے اور اس کے لئے ہرممکن قدم اُٹھانے کی ضرورت ہے۔اسی اقدام کے طور پر جماعت نے اعلان کیا ہے کہ ریاض کے جو بھی ممبران 7/مئی کو ہونے والے لوک سبھا انتخابات میں ووٹنگ کے لئے انڈیا جانا چاہتے ہوں، اُن کے جانے کی ٹکٹ جماعت اسپاونسر کرے گی۔
ساحل آن لائن کو معلومات فراہم کرتے ہوئے بھٹکل مسلم اسوسی ایشن ریاض کے صدر محمد عمار قاضیا نے بتایا کہ اس بار کے لوک سبھا انتخابات نہایت اہمیت کے حامل ہیں، جمہوریت، سیکیولرزم اور امن و سلامتی کی بحالی کےلئے ہر مسلمان کے لئے ضروری ہے کہ وہ اپنے ووٹ کی طاقت کو سمجھیں اور تمام کاموں اور اُمور کو بالائے طاق رکھ کرانتخابات کے دن پولنگ بوتھ پہنچیں۔عمار نے بتایا کہ زیادہ سے زیادہ ووٹنگ کرنا اس قدر ضروری ہے کہ مسلمانوں کو اس کے لئے بھلے ایک دو دن کی چھٹی بھی لینی پڑے تو لینی چاہئے اور کسی بھی شہر میں رہتے ہوں ، پولنگ کے دن اپنے اپنے پولنگ بوتھ پر پہنچنا چاہئے۔ اسی مقصد کے تحت جماعت کی انتظامیہ میٹنگ میں جو آج جمعہ کو منعقد ہوئی، اس بات کا فیصلہ لیا گیا کہ ووٹنگ کے لئے جو بھی ممبران انڈیا جانا چاہتے ہوں، جماعت کی جانب سے اُنہیں انڈیا جانے کی ٹکٹ کا انتظام کیا جائے گا۔
بتاتے چلیں کہ اتنے اہم اور ضروری انتخابات کو لے کر بھٹکل میں اب تک کسی طرح کی ہلچل نظر نہیں آرہی تھی۔چونکہ اب تک کوئی بھی اُمیدوار کسی بھی مسلم علاقوں میں انتخابی پرچار کے لئے بھی نہیں پہنچا ہے، یہی وجہ ہے کہ مسلم علاقوں میں الیکشن کو لے کر کسی طرح کا جوش وخروش نظر نہیں آرہا ہے، مگر سعودی عربیہ کے دارلحکومت ریاض میں واقع بھٹکل کی اس جماعت کے اہم فیصلے نے گلف کے ساتھ ساتھ ہندوستان کے مختلف شہروں میں قائم بھٹکلی جماعتوں کو بھی متحرک کردیا ہے۔
ریاض جماعت نے اپنے ممبران کو ووٹنگ کے لئے انڈیا جانے کی سہولت فراہم کرکے جو پہل کی ہے، سمجھا جارہا ہے کہ گلف کی دیگر جماعتوں کے ساتھ ساتھ ہندوستان کے مختلف شہروں کی جماعتیں بھی اپنے اپنے طور پرمتحرک ہوجائیں گی اور اپنی جماعتوں کے اراکین کو ووٹنگ کےلئے بھٹکل روانہ کرنے ہرممکن اقدامات کریں گی۔
بھٹکل مسلم اسوسی ایشن ریاض کی آج کی میٹنگ میں بھٹکل سے تشریف فرما مرکزی خلیفہ جماعت المسلمین کے قاضی مولانا خواجہ معین الدین اکرمی مدنی بھی موجود تھے جنہوں نے جماعت کے اس اہم اقدام کی بے حد سراہنا کی اور اسے قوم و ملت کے لئے نیک فال قرار دیا۔ جماعت کے سرپرست جناب عبدالعلیم قاضیا، سکریٹری صُہیب مصباح ، اراکین انتظامیہ حبیب اللہ محتشم، عبدالرقیب پلور، ذُھیب پیشمام، ظہیر کریکال ، عقبیٰ لنکا، عمران ایس ایم ، عبدالماجد ایس ایم، نعمت اللہ کوبٹے، سید ہاشم کریکال، عصمت جاکٹی وغیرہ بھی موجود تھے۔