بیدر میں وزیراعلیٰ سدرامیا نے وزیراعظم مودی پر کی سخت تنقید
بیدر، 25/اپریل (ایس او نیوز /ایجنسی) بیدر کے انتخابی دورہ پر کرناٹک کے وزیراعلیٰ سدرامیا نے وزیراعظم نریندر مودی پر یہ کہہ کر سخت تنقید کی کہ اُنہیں انتخابات کے موقع پر ہی کرناٹک کی یاد آتی ہے۔ شہر کے گنیش میدان میں منعقدہ کانگریس پارٹی کے انتخابی جلسہ سے خطاب کرتے ہوئے انہوں نے کہا کہ ریاست میں شدید خشک سالی ہے، لیکن وزیراعظم مودی ریاست کے لوگوں کے مسائل کو سننے نہیں آئے ہیں بلکہ الیکشن میں ووٹ مانگنے آئے ہیں۔
سدرامیا نے کہا کہ اسمبلی انتخابات سے قبل کانگریس نے عوام سے جو وعدے کئے تھے اُسے ہم پورا کررہے ہیں، ہم نے اسمبلی انتخابات سے پہلے جن پانچ ضمانتوں کی بات کی تھی، ہم نے اسے نافذ کردیا ہے اور لوگ اس سے مستفید ہو رہے ہیں۔یہی وجہ ہے کہ ووٹ مانگنا ہمارا اخلاقی حق ہے، لیکن وزیراعظم مودی نے جو وعدے کئے تھے، اُسے انہوں نے پورا نہیں کیا ہے ۔ بی جے پی کو جھوٹ کی فیکٹری قرار دیتے ہوئے سدرامیا نے کہا کہ بی جے پی جھوٹ بولنے میں ماہر ہے۔ ہماری کانگریس سرکار نے ریاست میں پانچوں ضمانتوں کو لاگو کیا ہے، اگر مرکز میں ہماری حکومت آتی ہے تو ہم مزید ضمانتوں کو بھی نافذ کریں گے۔ سدرامیا نے کانگریس کارکنوں پر زور دیا کہ وہ عوام کے پاس جائیں اور پارٹی کے کاموں سے اُنہیں آگاہ کرائیں۔
وزیراعلیٰ نے کہا کہ مودی کے دور حکومت میں ملک کا آئین اور جمہوریت دونوں خطرے میں ہیں۔ آئین زندہ رہے گا تو سب بچیں گے۔ آئین میں سب کے لیے یکساں مواقع فراہم کیے گئے ہیں۔ بی جے پی کسی نہ کسی طرح آئین کو تبدیل کرنے کی سازش کی ہے۔ وہ آمریت لانے کی کوشش کر رہے ہیں۔ تاہم انہوں نے خبردار کیا کہ اگر آئین کو ہاتھ لگایا گیا تو ملک میں خونی انقلاب آئے گا۔
اس موقع پر ریاستی وزیر ایشور کھنڈرے، قانون ساز کونسل کے ارکان اروند کمار ارالی، چندر شیکھر پاٹل، بھیم راؤ پاٹل، فشریز کارپوریشن کے چیئرمین مالا بی۔ نارائن راؤ، کانگریس کے ضلع صدر بسواراج جباشیٹی، راج شیکھر پاٹل، وجے سنگھ، اشوک کھینی، بھیم سینا راؤ شندے، گیتا پنڈت راؤ، میناکشی سنگرام، ریشما ملیکارجن، آنند دیوپا اور دیگر موجود تھے۔