منڈگوڈ میں ڈاکٹر انجلی نمبالکر نے کہا : وزیر اعظم صرف من کی بات کرتے ہیں اور جن کی بات بھول جاتے ہیں
منڈگوڈ ، 25 / اپریل (ایس او نیوز) لوک سبھا کے لئے کانگریسی امیدوار ڈاکٹر انجلی نمبالکر نے منڈگوڈ کے ملگی نامی علاقے میں انتخابی اجلاس سے خطاب کرتے ہوئے کہا کہ گزشتہ دس برسوں میں وزیر اعظم نریندرا مودی نے صرف من کی بات کی ہے اور انہیں کبھی جن کی بات یاد نہیں آئی ۔
ڈاکٹر انجلی نے دیش کے لئے کانگریس کی خدمات کا ذکر کرتے ہوئے بی جے پی سے سوال کیا کہ گزشتہ دس برسوں میں اس نے ملک اور عوام کے لئے کیا خدمات انجام دی ہیں ۔ انجلی نمبالکر نے کہا کہ کسانوں نے سال بھر احتجاجی مظاہرے کیے مگر وزیر اعظم نے ایئر کنڈیشنڈ روم سے باہر نکل کر کسانوں سے بات چیت کرنے کی زحمت گوارہ نہیں کی ۔ کانگریس نے عوام اور کسانوں کے لئے جو خدمات انجام دی ہیں اسے سامنے رکھتے ہوئے کانگریس کو ووٹ دینا چاہیے ۔
اسی طرح تعلقہ کے کاتور علاقے میں جلسے سے خطاب کرتے ہوئے ضلع انچارج وزیر منکال وئیدیا نے کہا کہ مجھے پورا یقین ہے کہ جھوٹ کی بنیاد پر سیاست کرنے والی بی جے پی کو اتر کنڑا سیٹ پر شکست ہوگی اور کانگریسی امیدوار ڈاکٹر انجلی کو ایک لاکھ سے زائد ووٹوں سے کامیابی ملے گی ۔
اس موقع پر کانگریس کے سینئر لیڈر آر وی دیشپانڈے ، رکن اسمبلی بھیمنّا نائک، ضلع کانگریس کمیٹی صدر سائی گاونکر اور دیگر کانگریسی لیڈران موجود تھے ۔
