اُتر کنڑا میں آج سے 30 اپریل تک چلے گی عمر رسیدہ، معذور افراد کے لئے گھر سے ووٹ دینے کی سہولت
کاروار 25 / اپریل (ایس او نیوز) ضلع ڈپٹی کمشنر گنگو بائی مانکر کی طرف سے جاری کیے گئے بیان کے مطابق الیکشن کمیشن کی طرف سے معذورین اور 85 سال سے زائد عمر والوں کے لئے گھر سے ووٹ دینے کی جو سہولت فراہم کی گئی ہے، اتر کنڑا میں آج سے اس کی آغاز ہو گیا ہے اور 30 اپریل تک یہ کارروائی چلے گی ۔
ضلع اتر کنڑا میں اس وقت 85 سال سے زائد عمر کے 3046 افراد اور 1977 معذورین اپنے اپنے گھروں سے ووٹ دینے کے اہل زمرے میں شامل ہیں ۔ انتخابی ڈیوٹی پر تعینات افسران متعلقہ ووٹروں کے گھروں تک پہنچ کر انہیں اپنا حق رائے دہی استعمال کرنے کی سہولت فراہم کریں گے ۔
گھر سے ووٹنگ کا حق رکھنے والے افراد کو افسران کے پہنچنے کا وقت اور دیگر تفصیلات کے بارے میں متعلقہ علاقے کے بی ایل او کی طرف سے پیشگی اطلاع دی گئی ہے ۔ اس کام کو انجام دینے کے لئے ضلع میں افسران کی کُل 133 ٹیمیں تشکیل دی گئی ہیں ۔ افسران کی ٹیمیں اپنے لئے مختص کیے گئے مقامات پر مقررہ تاریخ اور وقت کے مطابق ووٹرس کے گھر پہنچ جائیں گے ۔