لوک سبھا انتخابات 2024: 88 سیٹوں پر ووٹنگ ختم؛ شام پانچ بجے تک تریپورہ میں سب سے زیادہ اور اُترپردیش میں سب سے کم پولنگ
نئی دہلی 26/اپریل (ایس او نیوز) لوک سبھا الیکشن 2024 کے کے دوسرے مرحلہ میں آج ملک کی 13 ریاستوں سمیت مرکز کے زیر انتظام خطوں کی جملہ 88 سیٹوں پر انتخابات کا عمل انجام پا گیا۔جس میں شام پانچ بجے تک ملی اطلاع کے مطابق تریپورہ میں سب سے زیادہ 79.50 فیصد پولنگ ریکارڈکی گئی جبکہ سب سے کم پولنگ اُترپردیش میں 52.91 فیصد ووٹنگ درج کی گئی۔
اس مرحلہ میں راہل گاندھی اور ہیما مالنی سمیت کئی مشہور ہستیوں کا وقار داؤ پر ہے۔
انتخابی کمیشن کے مطابق شام 5 بجے تک آسام میں 70.66 فیصد، بہار میں 53.03 فیصد، چھتیس گڑھ میں 72.13 فیصد، جموں و کشمیر میں 67.22 فیصد، کرناٹک میں 63.90 فیصد، کیرالہ میں 63.97 فیصد، مدھیہ پردیش میں 54.83 فیصد، مہاراشٹر میں 53.51 فیصد، منی پور میں 76.06 فیصد، راجستھان میں 59.19 فیصد، تریپورہ میں 77.53 فیصد، اتر پردیش میں 52.74 فیصد اور مغربی بنگال میں 71.84 فیصد حق رئے دہی درج ہوا ہے۔
’منی پور میں جمہوریت ہائی جیک‘، کانگریس نے لگایا سنگین الزام
لوک سبھا انتخابات کے دوسرے مرحلے میں 88 لوک سبھا سیٹوں کے لیے ہوئی پولنگ کے دوران منی پور میں باہری لوک سبھا سیٹ کے کچھ حصوں پر بھی ووٹ ڈالے جا نے کے وران کانگریس نے منی پور میں پیدا حالات کو لے کر سنگین سوال اٹھا دیے ہیں۔ کانگریس کا الزام ہے کہ منی پور میں سیکورٹی فورسیز کے سامنے زبردستی این ڈی اے کے حق میں ووٹ ڈلوائے جا رہے ہیں۔ یہ الزام کانگریس جنرل سکریٹری جے رام رمیش نے عائد کیا ہے۔ انہوں نے سوشل میڈیا پلیٹ فارم ’ایکس‘ پر ایک ویڈیو شیئر کرتے ہوئے دعویٰ کیا ہے کہ باہری منی پور کے اکھرول ضلع میں لوگوں کو این ڈی اے میں شامل پارٹی این پی ایف کو ووٹ دینے کے لیے مجبور کیا جا رہا ہے۔