اُتر کنڑا میں چڑھ رہا ہے سیاسی پارہ - پرچار کے لئے وزیر اعظم نریندر مودی اور کرناٹک کے وزیراعلیٰ سدا رامیا کریں گے ضلع کا دورہ
کاروار 25 / اپریل (ایس او نیوز) لوک سبھا انتخابات کے دوسرے مرحلے کے لئے اُتر کنڑا میں سیاسی پارہ پوری قوت سے اوپر کی طرف بڑھ رہا ہے کیونکہ اپنے اپنے امیدواروں کے پرچار کے لئے وزیر اعظم نریندرا مودی اور وزیر اعلیٰ سدا رامیا کے دورے طے ہوئے ہیں ۔
اُتر کنڑا میں 7 مئی کو پولنگ ہونی ہے اور اسی حوالے سے 28 اپریل کو سرسی میں وزیر اعظم نریندرا مودی کا پروگرام منعقد کیا گیا ہے ۔ بی جے پی امیدوار وشویشورا ہیگڑے کاگیری وزیر اعظم مودی کے نام پر ہی عوام سے ووٹ طلب کر رہے ہیں ، اس لئے کاگیری نے مودی کی آمد سے بڑا فائدہ ہونے کی امید رکھی ہے ۔ کہا جاتا ہے کہ پچھلے ایک ہفتے سے بی جے پی کی طرف سے سرسی میں انتخابی تشہیر کے نریندرا مودی کے دورے کی تیاریاں کی جا رہی ہیں ۔ اس اجلاس میں صرف اتر کنڑا ہی نہیں بلکہ ہاویری اور شیموگہ ضلع سے بھی ووٹروں کو شریک کرانے کی کوشش کی جا رہی ہے ۔ ایک لاکھ سے زائد افراد کو مودی کا خطاب سننے کے لئے سرسی کے ماریکمبا اسٹیڈیم میں جمع کرنے کا منصوبہ بنایا گیا ہے ۔
ادھر دوسری طرف کانگریسی امیدوار ڈاکٹر انجلی نمبالکر کی تشہیری مہم کے دوسرے مرحلے میں حصہ لینے کے لئے کانگریس پارٹی کے ریاستی لیڈران نے اتر کنڑا دورے کا پروگرام وضع کیا ہے ۔ ویسے تو ضلع انچارج وزیر منکال وئیدیا اور سابق وزیر آر وی دیشپانڈے نے اب تک ڈاکٹر انجلی کے حق میں بڑی زوردار تشہیری مہم چلائی ہے ۔ اب اس کو مزید تقویت دینے کے لئے وزیر اعلیٰ سدا رامیا 3 مئی کو اتر کنڑا کا دورہ کریں گے ۔
کمٹہ کے منکی میدان میں کانگریسی کارکنان کا زبردست عوامی اجلاس منعقد کیا جائے گا ۔ اس کے علاوہ 3 مئی کی دوپہر یا 4 مئی کو سدارامیا اور کانگریسی لیڈران کا منڈگوڈ میں بھی انتخابی تشہیر کا پروگرام منعقد کیا جائے گا ۔ اس دورے میں وزیر اعلیٰ کے ساتھ نائب وزیر اعلیٰ ڈی کے شیوکمار اور دیگر وزراء بھی شریک رہنے کی خبر ہے ۔