بی پی ایل سرپرست جناب خلیفہ محمد غوث نے کھلاڑیوں کو ہدایت دی کہ وہ اس کھیل کو نہایت ڈسپلن اور مہذب انداز میں کھیلیں ۔
پروگرام میں مہمان خصوصی کے طور پر تشریف فرما کینرامسلم خلیج کونسل کے صدر جناب عبدالقادر باشاہ رکن الدین نے کھلاڑیوں کی ہمت افزائی کی اورکہا کہ کھیل کے ساتھ ساتھ ہم کو دوسری فیلڈمیں بھی آگے آنے کی ضرورت ہے ۔ بھٹکل مسلم خلیج کونسل کے سکریٹری جناب محی الدین رکن الدین نے تمام کھلاڑیوں کو اچھے انداز میں کھیلنے کا مشورہ دیا ۔ بی ایم جے ڈی کے صدر جناب سعدا محمد اشفاق صاحب نے تمام کھلاڑیوں کو کھیل کے ساتھ سماجی کاموں میں بھی بھرپور حصہ لینے کی تاکید کی ۔ گراؤند مالکان و امپائرس نے بھی اس موقع پر مفیدمشوروں سے نوازا۔

افتتاحی تقریب میں بھٹکل کے نوجوان شاعر جناب عفان بافقی صاحب کا تیارکردہ بی پی ایل ترانہ بھی پیش کیا گیا ۔ پروگرام کی نظامت جیلانی محتشم اور عفان گنگاولی نے کی۔

این جی ٹی۔ بی پی ایل ٹورنامنٹ کا پہلا میچ ڈی وی ایس ا سمیشر اور قاسمجی واریرکے درمیان کھیلا گیا ۔ قاسجمی واریر نے ٹاس جیت کر پہلے بلے بازی کرتے ہوئے مقررہ 20 اووروں میں شاندار 181 رن بنائے جس میں ناگراج نائک کے 44 اور عبدالواحد ھیجب 32 رن شامل ہیں ۔ ڈی وی ایس کی طرف سے عبادہ برماور نے ۴ وکٹیں حاصل کیں ۔

ڈی وی ایس  نے جب بلے بازی کی شروعات کی تو آغاز بے حد خراب رہا، 84 پر چار وکٹیں گرنے کے بعد ایسا لگ رہا تھا کہ میچ ڈی وی ایس کے ہاتھوں سے نکل چکا ہے، مگر ایسے میں عُبادہ برماور بلے بازی کے لئے میدان میں اُترے اورآتے ہی رنوں کی برسات شروع کردی۔ابتدائی چار ٹاپ کھلاڑیوں کے پویلین لوٹنے کا ان پر کوئی اثر نہیں ہوا اور وہ اپنی روایتی جارحانہ بلے بازی پر اُتر آئے۔ عبادہ نے ایک کے بعدایک 12چھکے لگاتے ہوئے قاسمجی ورئیرس کی اُمیدوں پر پانی پھیر دیا اور صرف 41 گیندوں پر 114 رن اسکور کرتے ہوئے اپنی ٹیم کوصرف 16 ویں اوور میں ہی جیت کی نیّا کو پار کرادیا۔انہوں نے اپنی اننگز میں آٹھ چوکے بھی لگائے۔

دوسرا میچ ابوظبی رائڈرس اور میک ہوم چیلنجر کے مابین شروع ہوا ۔ ٹاس جیت کر پہلے بیٹنگ کرتے ہوئے ابوظبی رائڈرس نے بی پی ایل کی تاریخ کا سب سے بڑا اسکور261 رن کھڑا کرڈالا۔ جس میں فیصل پٹیل کے 81 رن اور کپتان عبدالباسط معلمی کے 71 رن بھی شامل ہیں، محمد عاقب حیدر کے 34 اور عبدالباسط معلم کے 26 رن بھی اتنے بڑے اسکور کو کھڑاکرنے میں معاؤن ثابت ہوئے اور تمام کھلاڑیوں کی مشترکہ کوششوں سے ابوظبی رائیڈرس نے اتنے بڑے اسکور کے ساتھ بی پی ایل ٹورنامنٹ کا اگلا پچھلا تمام ریکارڈ توڑ ڈالا۔ اس ٹارگیٹ کا پیچھا کرتے ہوئے میک ہوم کی شروعات بے حد خراب رہی پہلے ہی اوور میں دو اہم کھلاڑیوں کوواپس پویلین لوٹنا پڑا اس کے بعد کپتانی اننگ کھیلتے ہوئے عمران خطیب نے نہ صرف شانداربلکہ دھواں دار بلے بازی کی اورابوظبی کے کھلاڑیوں کو گراؤند کے چاروں خانے خوب دوڑنے پر مجبور کیا۔ صرف37گیندوں پر اپنی  تیز رفتار سنچری اسکور کرتے ہوئے ایک مرحلہ میں انہوں نے ابوظبی رائیڈرس کے لئے زبردست مشکلات کھڑی کردی، مگر ٹیم کے دوسرے کھلاڑی ان کا ساتھ دینے میں بری طرح ناکام رہے، جس کے نتیجے میں کپتان کی سبھی کوشش رائیگاں گئیں اور پوری ٹیم 210 رنوں پر ہی ڈھیر ہوگئی۔ سید علی سفیان نے کچھ حد تک مزاحمت کی اور دو چھکوں اور دو چوکوں کی مدد سے 34 رن بھی بنائے ، مگر وہ بھی زیادہ دیر تک ٹک نہیں پائے ۔ اس طرح ابو ظبی رائڈرنے 52 رنوں سے یہ میچ جیت لیا۔ خیال رہے کہ بی پی ایل ٹورنامنٹ میں ابوظبی رائیڈر کو پہلی مرتبہ موقع دیا گیا تھا اور اپنے پہلے ہی میچ میں انہوں نے اپنے خطرناک عزائم کا اشارہ دیتے ہوئے بی پی ایل کی تمام ٹیموں کو چوکنا کردیا ۔

ٹورنامنٹ کا تیسرا اور چوتھا میچ اگلے جمعہ 3؍فروری کو کھیلا جائے گا۔جس میں رکن الدین برادرس ٹائٹن کا مقابلہ یونیک اسٹرائیکرس کے ساتھ اور مرحبا چیمپس کا مقابلہ فور پارٹنرس چارجرس کے ساتھ ہوگا۔ ابتدائی دو میچوں میں ہی کھلاڑیوں کی دھماکے دار بلے بازی کو دیکھتے ہوئے بی پی ایل ذمہ داران کو توقع ہے کہ ٹورنامنٹ بے حد سخت اور نہایت دلچسپ ہوگا اور شائقین کرکٹ پورے ٹورنامنٹ سے بے حد محظوظ ہوں گے۔