قوم ِ نوائط کے سپوت سید خلیل الرحمن متحدہ عرب امارات کے 100فطین شخصیات میں شامل :عربین بزنس میگزین کی رپورٹ
دبئی:18/ستمبر (ایس اؤنیوز)اپنی برق رفتار ترقی، بلند و بالا عمارات اور خیرہ اندوزی سے عالم کو حیرت زدہ کرنےو الے خلیجی ممالک کی دلہن نگری دبئی سے انگریزی اور عربی زبان میں شائع ہونے والی ہفتہ وار میگزین ’’عربین بزنس ‘‘کےایک شمار ے میں ’’100 اسما رٹسٹ پیوپل اِن دی یو اےا ی ‘‘ میں قومی و بین الاقوامی سطح پر تجارتی ، سماجی خدمات انجام دیتے ہوئے مسیحا کا درجہ رکھنے والے، قوم ِ نوائط کے سپوت ، قائد قوم ’’ڈاکٹر ایس ایم سید خلیل الرحمن ‘‘ المعروف سی اے خلیل کو بھی فہرست میں شامل کرتے ہوئے ان کی بے لوث و انسانیت نواز خدمات کا اعتراف کیا گیا ہے ۔
متحدہ عرب امارت میں رہتے ہوئے دبئی سمیت خلیجی ممالک میں جدید زمانے کے تقاضوں کے تحت تجارتی میدان میں اپنی ذہانت وفطانت سے آسمان کی بلندیوں کو چھونے والے یو اے ای میں مقیم کل 100شخصیات کی خدمات کے اعتراف میں یہ شمارہ شائع کیا گیا ہے۔جس میں ہندوستان سے تعلق رکھنےو الے صرف بارہ لوگ ہی شامل ہیں جن میں سید خلیل الرحمن صاحب کی شخصیت نمایاں طور پر نظر آتی ہے۔
اپنی تجارتی سرگرمیوں ، کمپنیوں کی رہنمائی ، سرکاری سطح پر فائنانس معاملات کے قابل ِ اعتماد مشیر کی سند رکھنے والے سماجی ، تعلیمی میدان میں انمٹ نقوش چھوڑنے والے سید خلیل الرحمن کا انتخاب خود عربین بزنس میگزین کے لئے ایک اعزاز ہی کہا جاسکتاہے۔ شمار ے نے قائد قوم کے متعلق خاص نکات پیش کرتے ہوئے کہاہے کہ 1978میں خلیج کا رخ کرنے والے سید خلیل 30سال سے زائد عرصہ تک گلداری فیملی سے تعلق خاطر رکھتے ہوئے گلداری کمپنی کو آسمان تک پہنچا نے میں اپنا خاص کردار اداکیا ہے۔ فی الحال شارجہ کی کے اینڈ کے انٹرپرائزس جنرل ٹریڈنگ کمپنی کے بانی چیرمن کے طورپر تجارتی میدان میں مصروف ہیں۔ اور موصوف ساحل آن لائن اور مادھیمم کمیونکیشن کے چیرمن ہیں۔
قوم وملت کے مایہ ناز فرزند سید خلیل الرحمن کو ملنے والے ایوارڈس و القاب کی فہرست بڑھتی جارہی ہے ، اس سے قبل انہیں حکومت کرناٹکا کی طرف سے راجیہ اتسوا ایوارڈ، آئر لینڈکی الڈس گیٹ کالج کی طرف سے اعزازی ڈاکٹریٹ ،عرب اور ہندوستانی رسائل کی طرف سے شائع ہونے والے خصوصی شماروں میں شامل کیا جانا، بے شمار ملی و قومی اداروں، تنظیموں کی طرف سے اعزاز و تہنیت کرتے ہوئے ا ن کی خدمات کی ستائش کی گئی ہے۔ انہی میں اب عربین بزنس کا خصوصی شمارہ بھی شامل ہواہے۔
اس موقع پر ساحل آن لائن دل کی عمیق گہرائیوں سے سید خلیل الرحمن کو مبارکباد پیش کرتے ہوئے دعاگو ہے کہ اللہ تعالیٰ انہیں صحت مندو تنو مند رکھے۔ ہر بلا ومصیبت اور شرپسندوں کی شرارت سے محفوظ رکھے۔ قوم وملت کے لئے بہتر سے بہتر کام لیں۔آمین یا رب العلمین ۔