سعودی عربیہ میں چاند نظر آگیا؛ سعودی سمیت عرب امارات، بحرین اور دیگر گلف ممالک میں رمضان کا اعلان؛ عمان میں ایک دن بعد یعنی منگل کو ہوگا پہلا روزہ
بھٹکل 10 مارچ (ایس او نیوز) سعودی عربیہ میں آج اتوار شام کو چاند نظر آنے کے بعد سعودی عربیہ سمیت متحدہ عرب امارات، قطر، بحرین اور کویت میں رمضان کا اعلان کیا گیا ہے۔البتہ مسقط میں رویت ہلال ثابت نہیں ہوا، اس لئے وہاں رمضان کا اعلان نہیں ہوا ہے۔
دبئی سے ساحل آن لائن کے نمائندے سجاد قاضی نے بتایا کہ سعودی عربیہ میں چاند دیکھے جانے کا اعلان ہوتے ہی دبئی سمیت پورے عرب امارات میں بھی رمضان کا اعلان کیا گیا ہے جس کے ساتھ ہی اتوار بعد نماز عشاء تراویح کی نماز ادا کی جارہی ہے۔دبئی، ابوظبی، شارجہ وغیرہ میں کل پیر کو پہلا روزہ ہوگا۔ اسی طرح کی خبر بحرین سے جناب اظہرالدین ارمار، دوحہ قطر سے جناب ابراہیم خلیل اور کویت سے جناب ہاشم معلم نے بھی دی ہے کہ وہاں پر بھی کل پیر کو رمضان کا پہلا روزہ ہوگا اور آج بعد نماز عشاء تراویح کی نماز جاری ہے۔
مسقط سے جناب فوزان محتشم نے بتایا کہ عمان میں کہیں پر بھی چاند نظر نہیں آیا ، اس لئے وہاں رمضان کا اعلان نہیں ہوا اس بناء پر عمان میں منگل کو پہلا روزہ ہوگا۔
بتاتے چلیں کہ بھٹکل اوریاست کرناٹک سمیت پڑوسی ریاست کیرالہ میں بھی آج 28 شعبان ہونے کی بنا پر کل پیر کو چاند رات ہوگی، اگر پیر شام کو کہیں پر بھی چاند نظر آتا ہے تو منگل کو پہلا روزہ ہوسکتا ہے۔