نئی دہلی، 27/اپریل (ایس او نیوز /ایجنسی) دہلی کے مبینہ شراب پالیسی گھوٹالہ سے متعلق منی لانڈرنگ معاملہ میں  عام آدمی پارٹی کے لیڈر منیش سسودیا کو عدالت کی طرف سے راحت نہیں ملی ہے اوران   کی عدالتی تحویل میں 8 مئی 2024 تک توسیع کر دی  گئی ہے۔ اس معاملہ کی تفتیش ای ڈی کی جانب سے کی جا رہی ہے۔

سسودیا نے گزشتہ ہفتہ لوک سبھا انتخابات میں عام آدمی پارٹی (عآپ) کے لئے تشہیر کرنے کے لئے پیش کی گئی عبوری ضمانت کی درخواست واپس لے لی تھی۔

عدالتی تحویل ختم ہونے پر جمعہ کو سسودیا کو راؤس اوینیو کورٹ کی جج کاویری باویجا کے سامنے پیش کیا گیا۔ عدالت نے سابقہ سماعت کے دوران دائر کی گئی مستقل ضمانت کی درخواست پر اپنا فیصلہ 30 اپریل کے لئے محفوظ رکھا تھا۔ انہوں نے ان معاملوں میں ضمانت کی درخواست کی تھی جن میں سی بی آئی اور ای ڈی دونوں کی جانب سے تفتیش کی جا رہی ہے۔

قبل ازیں، ای ڈی نے سسودیا اور دیگر ملزمان پر معاملہ کی سماعت میں تاخیر کرنے کا الزام عائد کیا تھا۔ ان کی درخواست ضمانت کی حمایت میں سسودیا کے کے وکیل موہت ماتھر نے تفتیش پوری کرنے کے خلاف دلیل دی تھی۔ انہوں نے دعویٰ کیا کہ ان کے موکل کو مبینہ رشوت کی رقم سے منسلک کرنے کا کوئی ثبوت موجود نہیں ہے۔

موہت ماتھر نے کہا کہ جرائم کی مبینہ آمدنی سے سرکاری خزانے کو کوئی نقصان نہ ہونے کی بات ثابت نہیں ہوئی۔ مقدمہ میں تاخیر کے حوالہ سے کہا کہ سسودیا کو کورٹ جانے کی اجازت دینے والا حکم 6 مہینے پرانا ہے اور تفتیش اب تک پوری ہو جانی چاہئے تھی۔

معاملہ میں ایک دیگر ملزم بینائے بابو کو دی گئی ضمانت کا حوالہ دیتے ہوئے ماتھر نے درخواست ضمانت منظور کرنے کے لئے دلیل دی تھی کہ سسودیا با بااثر عہدے پر فائز نہیں ہیں۔