بھٹکل 25 ڈسمبر (ایس او نیوز)  بھٹکل کی معروف ٹیم پرشورام اسپورٹس سینٹر کے زیر اہتمام انٹرڈسٹرکٹ کبڈی ٹورنامنٹ کا سنیچر رات کو  شاندار آغا ز ہوا جس میں بھٹکل سمیت پڑوسی اضلاع کی 24 ٹیمیں حصہ لے رہی ہیں۔

شہر کے مُٹھلی میں  منعقدہ خوبصورت کبڈی اسٹدیم میں ہزاروں شائقین کبڈی کی موجودگی میں بھٹکل رکن اسمبلی سُنیل نائک نے   چراغ جلاتے ہوئے  ٹورنامنٹ کا افتتاح کیا، بی جے پی  لیڈر گوند نائک نے ربن کاٹ کر کبڈی ا سٹڈیم کا افتتاح کیا، جبکہ  بھٹکل بلاک ایجوکیشن آفسر اور پرشورام کے سابق کھلاڑی دیوی داس موگیر نے پروگرام کی صدارت کی۔ ٹورنامنٹ کو پرشورام کے بہترین سابق کھلاڑی منوج نائک کے نام سے منسوب کیا گیا ہے جن کی   گذشتہ سال  دل کا دورہ پڑنے سے موت واقع  ہوئی تھی۔

ٹورنامنٹ میں بھٹکل  کی پرشورام، کٹے ویرا، بی سی اے، سوپر اسٹار، ٹائیگر بھٹکل کے ساتھ ساتھ پڑوسی اضلاع کی شموگہ، مینگلور ایس پی ایم، مینگلور الواس، اینے  پویا یونیورسٹی، منڈگوڈ، ہاویری اور بیندور کی ٹیموں سمیت جملہ 24 ٹیمیں  حصہ لے رہی ہیں۔

سنیچر رات نو بجے سے  میچس کاآغاز ہوا،درمیان میں افتتاحی تقریب ہوئی، پھر میچس کا سلسلہ رات ایک بجے تک جاری رہا۔ اب تک پانچ میچس کھیلے جاچکے ہیں، اتوار کو دوپہر دو بجے سے  مزید میچس کھیلے جائیں گے۔ اتوار دیر رات تک میچس کے نتائج سامنے آئیں گے اور  دیر رات کو ہی ٹورنامنٹ کی اختتامی تقریب ہوگی۔

بتاتے چلیں کہ ٹورنامنٹ میں اول انعام 44,444 روپیہ نقد مع ٹرافی، رنرزآپ  ٹیم کے لئے 33,333 روپیہ مع ٹرافی، جبکہ تھرڈٖ اور فورتھ آنے والی ٹیم کو 11,111 روپیہ مع ٹرافی سے نوازا جائے گا۔ 

بتایا گیا ہے ٹورنامنٹ کی فائنل تقریب میں  بھٹکل کے سابق رکن اسمبلی منکال وئیدیا مہمان خصوصی کے طور پر شریک ہوں گے۔