کاروار، 5 مئی (ایس او نیوز): لوک سبھا  انتخابات-2024 جو اُترکنڑا میں 7/مئی کو ہوں گے،   آزاد، صاف و شفاف اور پرامن  انتخابات کے لئے ضلعی انتظامیہ نے   تمام تیاریاں مکمل کرلی ہیں۔کاروار ڈی سی آفس میں   اخبارنویسوں سے گفتگو کرتے ہوئے  اُترکنڑا ڈپٹی کمشنر اورانتخابی ریٹرننگ افسر گنگوبائی مانکر نے  بتایا کہ   اترا کنڑ لوک سبھا حلقہ میں کل 1977 پولنگ بوتھوں کے لئے  6939 پولنگ افسران اور عملہ کو  انتخابی ڈیوٹی کے لیے تعینات کیا گیا ہے، انہیں پہلے ہی 2 سطح کی تربیت دی گئی ہے اور انتخابی ڈیوٹی کے لیے  اُنہیں پوری طرح سے لیس کیا گیا ہے۔

اُترکنڑا لوک سبھا حلقہ  میں کل 16,41,156 ووٹرس ہیں جن میں 8,23,604 مرد، 8,17,536 خواتین اور 16 دیگر ووٹر ہیں، ہر گھر میں ووٹر سلپس تقسیم کی گئی ہیں۔ انہوں نے کہا کہ ووٹر س اپنے شناختی  کارڈ   دکھا کر ووٹ ڈال سکتے ہیں۔  اس کے علاوہ، کل 1015 پولنگ بوتھس میں ویب کاسٹنگ کا اہتمام کیا گیا ہے، 303 مائیکرو آبزرور، 21 ویڈیو گرافرز اور 200 سیکٹر آفیشلز کو تفویض کیا گیا ہے۔ انہوں نے کہا کہ تمام پولنگ بوتھوں پر ووٹرز کے لیے پینے کے پانی اوردھوپ سے بچنے کے لئے  سایہ فراہم کرنے  کے انتظامات کیے گئے ہیں، بزرگ شہریوں اور معذور افراد کے لیے وہیل چیئر کا انتظام اور ریمپ کا انتظام کیا گیا ہے۔

انتخابی عملے کے لیے روزمرہ استعمال کی کٹ کے ساتھ ان کی صحت کو برقرار رکھنے کے لیے ہنگامی استعمال کے لیے ادویات کی کٹ بھی فراہم کی گئی ہے۔ انہوں نے کہا کہ خواتین پولنگ بوتھ، اسپیشل اسپرٹ پولنگ بوتھ اور یوتھ پولنگ بوتھ میں کام کرنے والے عملے کو خصوصی سہولیات دی جارہی ہیں۔

 چناو آفسر مانکر نے بتایا کہ  گھر سے ووٹنگ کے پروگرام میں 95 فیصد کامیابی حاصل  ہوئی، 5023 اہل ووٹرز میں سے 4819 نے ووٹ ڈالا، 64 انتقال کر گئے اور 140 گھر سے غیر حاضر رہے۔ آگے  کہا کہ ضلع میں 85 سال سے زائد عمر کے افراد اور معذور افراد کے پولنگ بوتھ پر آنے کے لیے مفت گاڑیوں کا انتظام کیا گیا ہے اور اس سہولت کے لیے 686 معذور افراد اور 238 بزرگ شہریوں نے اپنے نام درج کرائے ہیں۔

 انتخابات کے دوران ضلع میں کسی بھی قسم کے ناخوشگوار واقعات  کو روکنے کے لیے  پیشگی اقدامات کئے گئے ہیں اورہ 5 مئی کی شام 5 بجے سے 7 مئی کی درمیانی رات 12 بجے تک شراب نوشی پر پابندی عائد کی  گئی ہے  ۔ اسی طرح  5 مئی کو شام 6 بجے سے 7 مئی کو ووٹنگ کے اختتام تک  اُتر کنڑ الوک سبھا حلقہ کے 8 اسمبلی حلقوں کے پولنگ بوتھ کے  ارد گرد 200 میٹر تک سی آر پی سی کی دفعہ 144 نافذ کر دی گئی ہے۔