کڈبا سبرامنیا میں بجلی گرنے سے نوبیاہتا شخص ہلاک
بیلتگنڈی،5 / مئی (ایس او نیوز) کڈبا تعلقہ کے سبرامنیا میں کل شام ایک المناک حادثہ پیش آیا جس میں آسمانی بجلی گرنے سے ایک نوبیاہتا شخص ہلاک ہو گیا ۔
ذرائع سے ملی اطلاع کے مطابق کل شام کو جب سبرامنیا کے علاقے میں گھنے بادل چھا گئے اور تیز بارش کے آثار نظر آنے لگے تو شام سندر نامی شخص نے سپاریوں کے ڈھیر کو بارش سے بچانے کے لئے انہیں ایک جگہ اکٹھا کرنا شروع کیا ۔ اسی دوران بجلیاں کڑکنے لگیں اور جب ایک بجلی گری تو شام سندر اس کی زد میں آنے سے زخمی ہوگیا ۔ اسے فوری طور پر کڈبا کے کمیونٹی اسپتال میں لے جایا گیا مگر زخموں کی تاب نہ لاتے ہوئے اس نے دم توڑ دیا ۔
معلوم ہوا ہے کہ شام سندر سبرامنیا میں کار واش کا بزنس چلا رہا تھا اور ابھی صرف دس دن پہلے اس کی شادی ہوئی تھی ۔