کمٹہ،  5 / مئی (ایس او نیوز) کانگریس پارٹی کی طرف سے منکی میدان میں منعقدہ پرجا دھونی ۔2 اجلاس سے خطاب کرتے ہوئے ریستی وزیر اعلیٰ سدا رامیا نے براہ راست وزیر اعظم پر فقرہ کستے ہوئے کہا کہ مودی ایک بہت اچھے ڈرامے باز اور ایوینٹ منیجر ہیں ۔ 
    
سدا رامیا نے پرجول ریونّا سیکس اسکینڈل کے حوالے سے وزیر اعظم اور بی جے پی کو نشانے پر لیتے ہوئے کہا کہ یہ لوگ خواتین کو تحفظ دینے کی بات کرتے ہیں ۔ جب کہ بی جے پی نے جے ڈی ایس کے ساتھ دوستی اور اتحاد کیا ہے اس کے موجودہ ایم پی اور مشترکہ لوک سبھا امیدوار پرجول ریونّا نے خواتین کے ساتھ جو ظلم کیا ہے وہ جگ ظاہر ہو گیا ہے ۔ یہ بات معلوم رہنے کے باوجود بی جے پی نے جے ڈی ایس کے ساتھ اشتراک کرتے ہوئے خواتین کی عصمت دری کرنے والے شخص کو ٹکٹ دیا ہے ۔ کیا یہ خواتین کو تحفظ فراہم کرنے کی پالیسی ہے ؟ 
    
وزیر اعلیٰ نے اپنی پارٹی کی امیدوار ڈاکٹر انجلی نمبالکر کے لئے ووٹ دینے کی اپیل کرتے ہوئے کہا کہ  دس سال تک اقتدار میں رہنے کے باوجود مودی نے کرناٹکا یا دیش کے کمزروں اور غریب عوام کو تقویت پہنچانے کا کوئی کام نہیں کیا ۔ اس مرتبہ تبدیلی لانے کا موقع ہے ۔ 
    
انہوں نے کہا کہ بی جے پی والے کہتے تھے کہ مرکز اور ریاست میں ایک ہی پارٹی کی حکومت ہونے پر ڈبل انجن سرکار بنتی ہے ۔ ساڑھے تین سال تک یہاں ڈبل انجن کی سرکار رہنے کے بعد سوائے لوٹ مچانے کے اور کچھ نہیں کیا ۔ کرناٹکا کے ٹھیکیداروں کی طرف سے ریاستی بی جے پی حکومت کو  40% کمیشن والی سرکار قرار دینے پر بھی مودی نے کوئی رد عمل ظاہر نہیں کیا تھا ۔ الزام پر جوابی رد عمل ظاہر نہ کرنے کا مطلب یہی ہے کہ واقعی کرپشن ہوا ہے ۔ 
    
 سدا رامیا نے کہا کہ مودی نے وزیر اعظم بننے سے قبل جتنے وعدے کیے تھے ان میں سے ایک وعدہ بھی پورا نہیں کیا ۔ دو کروڑ افراد کو روزگار فراہم کرنے کی بات کہی تھی لیکن جب تعلیم یافتہ نوجوان روزگار طلب کرنے لگے تو مودی نے کہا کہ 'پکوڑے بیچو'۔ انہوں نے پوچھا کہ کیا وزارت عظمیٰ جیسے اہم ترین منصب رہنے والے شخص کو اس طرح کی بات زیب دیتی ہے ؟ یہ بات یاد رکھنی چاہیے کہ جب آپ مسائل حل کرنے کی صلاحیت نہیں رکھتے تو پھر آپ اس کرسی کے اہل نہیں ہو ۔