آئین کو بچانے کے لیے اس اہم الیکشن میں حصہ لیں اور پورے اعتماد کے ساتھ کانگریس کو ووٹ دیں - بھٹکل میں کانگریس جنرل سکریٹری کا بیان
بھٹکل 5/مئی (ایس او نیوز) : ملک میں ہو رہی تبدیلیوں کو دیکھتے ہوئے یہ الیکشن آئین کو بچانے کے لیے سب سے اہم الیکشن ہے، ایسے میں ملک کے تمام لوگوں کے لئے ضروری ہیں کہ وہ کانگریس کے حق میں ووٹ دیں اور دستور کو بچانے کے لئے کانگریس کو مضبوط کریں۔ یہ بات کرناٹکا پردیش کانگریس کمیٹی کے جنرل سکریٹری اور مینگلور سے لوک سبھاحلقہ کے کانگریسی اُمیدوار پدما راج پجاری نے کہی۔
بھٹکل کانگریس پارٹی دفتر میں اخبارنویسوں سے گفتگو کرتے ہوئے انہوں نے کہا کہ کانگریس نے کبھی کسی سے نفرت نہیں کی۔ کانگریس ہمیشہ محبت کا پیغام پھیلا کر ملک کو عالمی چیمپئن بنانے کا خواب دیکھتا ہے۔ انہوں نے کہا کہ ہماری پارٹی نے معاشرے کی تمام برادریوں کو ساتھ لے کر ملک کی تعمیر کی کوشش کی ہے۔ پچھلے تیس سالوں سے اُترکنڑا حلقے میں بی جے پی کے ممبران پارلیمنٹ رکھنے کا کوئی فائدہ نہیں ہوا۔یہاں کی سڑکوں کی حالت دیکھئے، ابھی تک ہائی وے کا تعمیراتی کام تکمیل نہیں پہنچا ہے، اتنے سالوں سے یہاں بی جے پی کا رکن پارلیمنٹ ہے، لیکن کبھی اُس نے ضلع کی ترقی کے لئے کچھ بھی کام نہیں کیا۔ انہوں نے ویشویشور ہیگڈے کاگیری کا نام لئے بغیر آگے کہا کہ یہی حال لوک سبھا انتخابات کے لئے کھڑے مخالف اُمیدوار کا ہے، وہ بھی چھ بار اپنے حلقہ سے اسمبلی میں موجود تھا، لیکن اُس نے بھی ضلع کے لئے کچھ نہیں کیا۔ یہاں ایک سوپر اسپیشالٹی اسپتال تک نہیں ہے اور لوگ پڑوسی اضلاع اڈپی اور مینگلور جانے کے لئے مجبور ہیں۔
آننت کمار ہیگڈے کا نام لئے بغیر اُس پر طنز کرتے ہوئے کہا کہ دستور کو تبدیل کرنے کی بات کرنے والے ہمیشہ مذہب اور ذاپ پات کی ہی باتیں کرنے اور آپس میں منافرت پھیلانے کا ہی کام کرتے آئے ہیں، اگر اُن سے ضلع کی ترقی کے تعلق سے سوال کریں تو اُن کے پاس کوئی جواب نہیں ہے۔
پدما راج پجاری نے کہا کہ اب پورے ملک میں کانگریس پارٹی کے حق میں ہوا چل رہی ہے، لوگ نفرت کی سیاست سے تنگ آچکے ہیں اور لوگ ملک میں تبدیلی چاہتے ہیں۔ اُترکنڑا لوک سبھا حلقہ میں عوام تبدیلی کے خواہا ں ہیں۔ اور کانگریس نے اس حلقہ کی ترقی کےلئے اِس بار ڈاکٹر انجلی نمبالکر کو اُتارا ہے۔ بھٹکل سمیت اُترکنڑا کے عوام کو چاہئے کہ وہ بڑھ چڑھ کر انتخابات میں حصہ میں لیں اور کانگریس کے حق میں ووٹنگ کرتے ہوئے اسے پارلیمنٹ پہنچائیں۔
کارکلا سے تشریف فرما کانگریس لیڈر ادے کمار شیٹی ،بھٹکل بلاک کانگریس صدر وینکٹیش نائک، دیگر لیڈران گوپال نائک، ایشورموگیر، سریش نائک، منجپا نائک، رمیش نائک، دیوی داس آچاری ،سُدھاکر نائک و دیگر موجود تھے۔
