ساو پالو، 4/مئی (ایس او نیوز /ایجنسی) برازیل کی جنوبی ریاست ریو گرانڈے ڈو سل میں مسلسل چار دنوں سے جاری شدید بارش اور مٹی کے تودے گرنے کے بعد آئے  طوفان میں 29 افراد  ہلاک ہوگئے  جبکہ  60 دیگر لاپتہ بتائے گئے ہیں۔ گورنر ایڈورڈو لیٹی نے جمعرات کو  بتایا  مرنے والوں کی تعداد میں اضافہ ہونے کا  امکان  ہے۔ انہوں نے طوفان کو اعلیٰ زرعی اور مویشی پیدا کرنے والی ریاست کی تاریخ کی بدترین قدرتی آفت قرار دیا۔

برازیل کے صدر لوئیز اناسیو لولا دا سلوا نے  ریاست کے سب سے زیادہ متاثرہ شہروں میں سے ایک سانتا ماریا کا دورہ کیا اور مسٹر لیٹی سے ملاقات کی۔ مسٹر لولا نے یوراگوئے اور ارجنٹینا کی سرحد سے متصل ریاست میں ہنگامی صورتحال سے نمٹنے کے لیے وفاقی فنڈنگ اور امداد کی پیشکش کی۔ صدر نے کہا کہ صحت کی دیکھ بھال کے لیے وفاقی حکومت کی مدد کی کوئی کمی نہیں ہوگی، ٹرانسپورٹیشن اور خوراک کی دیکھ بھال کے لئے فنڈز کی کوئی کمی نہیں ہوگی۔

انہوں نے کہاہم 24 گھنٹے کوشش کریں گے تاکہ بارش میں پھنسے لوگوں کی بنیادی ضروریات کو پورا کرسکیں۔ مزید بارش کی پیشن گوئی کے ساتھ، گورنر نے لوگوں سے اونچی جگہ پر جانے اور سول پروٹیکشن ایجنسی کی طرف سے شناخت کیے گئے سیلابی علاقوں سے دور رہنے کی اپیل کی۔ انہوں نے کہا کہ تقریباً 4,400 مکینوں کو نکالا گیا ہے لیکن ہزاروں افراد اپنے سیلاب زدہ گھروں سے نکالے جانے کے منتظر ہیں۔ سول ڈیفنس بلیٹن کے مطابق قدرتی آفت سے 154 شہر متاثر ہوئے ہیں۔