ہبلی میں منعقدہ انٹرکالج کرکٹ ٹورنامنٹ میں بھٹکل انجمن کا شاندار پرفارمینس؛ دوسرا مقام حاصل کرنے میں کامیاب
بھٹکل 30/ اپریل (ایس او نیوز) ہبلی میں منعقدہ کرناٹکا یونیورسٹی دھارواڑ (کے یو ڈی) سکینڈ زون انٹرکالج کرکٹ ٹورنامنٹ میں بھٹکل انجمن انسٹی ٹیوٹ آف مینجمنٹ اینڈ کمپوٹر اپلیکشن (AIMCA) نے شاندارپرفارمینس پیش کرتے ہوئے دوسرا مقام حاصل کیا ہے۔
ٹورنامنٹ میں آٹھ ٹیموں انجمن کالج بھٹکل، اکسفورڈ کالج ہبلی، انجمن ڈگری کالج بھٹکل، گرو سدھیندرا کالج بھٹکل، گلوبل کالج ہبلی، جے جی کالج ہبلی، نہرو کالج ہبلی اور ایس کے آرٹس کالج ہبلی نے حصہ لیا تھا۔
بھٹکل AIMCA نے شاندار کھیل کا مظاہرہ پیش کرتے ہوئے پہلے کوارٹر فائنل میں اکسفورڈ کالج ہبلی کو 110 رنوں سے ہرادیا۔ انجمن نے پہلے بلے بازی کرتے ہوئے بیس اووروں میں 250 رنوں کا پہاڑ کھڑا کردیا جس میں انجمن کے مروان فقی احمد نے صرف 67 گیندوں پر چھ چھکوں اور15 چوکوں کی مدد سے دھواں داربلے بازی کرتے ہوئے ناٹ آوٹ 140 رن بنا ڈالے، اس کے ساتھ ذیشان مختصر نے بھی 50 رنوں کا سہارا دیا۔ جبکہ جواب میں اکسفورڈ کالج 140 رنوں پر ہی ڈھیر ہوگئی۔ اس میچ میں انجمن کے کپتان خُرّم گوائی نے بہترین باولنگ کرتے ہوئے مخالف ٹیم کو کھل کر کھیلنے کا موقع ہی نہیں دیا۔ انہوں نے تین اوروں میں 23 رن دے کرتین وکٹیں حاصل کیں، اس طرح یہ میچ بھٹکل انجمن نے 110 رنوں سے جیت لیا۔
سیمی فائنل میں بھٹکل AIMCA نے ہبلی کی گلوبل کالج کے خلاف بھی شاندارپرفارمینس کا مظاہرہ کیا اور پہلے بلے بازی کرتے ہوئے بیس اووروں میں 234 رن اسکور کرڈالے۔ اس میچ میں بھی انجمن کے اسٹار بلے باز مروان فقی احمدا نے پھر ایک بارجارحانہ بلے بازی کا مظاہرہ پیش کرتے ہوئے محض52 گیندوں پر 104 رن بناڈالے جس میں انہوں نے 18 چوکے اور ایک چھکا لگایا۔ جواب میں انجمن نے ہبلی گلوبل کالج کو 124 رنوں پر ہی پویلین بھیج دیا، اس طرح یہ میچ بھی بھٹکل AIMCA نے 110 رنوں سے جیت کر فائنل میں رسائی حاصل کی۔ سیمی فائنل میں فیض قاضی نے شاندار گیند بازی کی اور چار اووروں مٰیں پانچ وکٹ حاصل کرکے مخالف ٹیم کی کمرتوڑ دی۔
سیمی فائنل کے فوری بعد فائنل کھیلا گیا اور میچ کو جلد ختم کرنے کےلئے فائنل میچ پندرہ اووروں کا رکھا گیا۔
فائنل میں بھٹکل AIMCA کا مقابلہ جی جے کامرس کالج ہبلی سے ہوا۔ اور مقررہ 15 اووروں میں بھٹکل نے مروان کے ہی تیز رفتار 60 رنوں کی بدولت 144 رن اسکور کئے۔ لیکن جواب میں جی جے کامرس کالج ہبلی نے تین وکٹوں کے نقصان پر ہی 145 ن اسکور کرکے فائنل جیت لیا۔
ٹورنامنٹ میں مروان فقی احمدا نے جس طرح کی بہترین بلے بازی پیش کی، اسے دیکھتے ہوئے ٹورنامنٹ کا بیسٹ بلے باز کا خطاب اسے حاصل ہوا۔ مروان کو کوارٹر فائنل اور سیمی فائنل میں مین آف دی میچ کےاعزاز سے بھی نوازا گیا۔
خُرّم گوائی کی قیادت میں بھٹکل AIMCA ٹیم میں مروان فقی احمدا، محمد فہیمان، آئینہ سدی باپا، ذیشان مختصر، فیض قاضی، صلاح حاجیکا، صمید احمد، محمد سُفیان، اسماعیل صدیقہ، محمد عوف، مازین قاسمجی، حمّاد کولا، صالح ارزان، ضمان جبالی شامل تھے۔ جبکہ ٹیم کی کوچ کی حیثیت سے کالج کے فزیکل ایجوکیشن ڈائرکٹر موہن میستا بھی ٹیم کے ساتھ موجود تھے۔
انٹرکالجیٹ کرکٹ ٹورنامنٹ میں رنرز آپ ٹرافی حاصل کرنے پر انجمن حامئی مسلمین بھٹکل کے صدر جناب محمد یونس قاضیا، جنرل سکریٹری جناب اسحاق شاہ بندری اور ایڈیشنل جنرل سکریٹری افتاب قمری سمیت دیگر عہدیداران، اراکین انتظامیہ اور پرنسپال محمد محسن نے پوری ٹیم کو مبارکباد پیش کی ہے۔