شیخ خلیفہ ایکسلینس ایوارڈ 2018 ۔ تُمبے گروپ کو ملے 4 ایوارڈز
دبئی،24فروری (ایس او نیوز)دبئی میں قائم جنوبی کینرا کے معروف کاروباری تُمبے گروپ کو’شیخ خلیفہ ایکسلینس ایوارڈ 2018‘کے تحت جملہ 4ایوارڈز سے نوازا گیا ۔ اس طرح ایک ہی سال میں چار ایوارڈ پانے کا اعزاز اس ایوارڈ کی تاریخ میں پہلی بار تُمبے گروپ کو حاصل ہوا ہے۔
ہر سال مختلف میدانوں میں خدمات انجام دینے والے اداروں اور شخصیات کے لئے ہرسال’شیخ خلیفہ ایکسلینس ایوارڈ ‘دیا جاتا ہے۔اس مرتبہ تفویض ایوارڈ کی یہ سولہویں سالانہ تقریب ابوظہبی کے ایمیریٹ پیلیس میں منعقد کی گئی تھی۔جس میں ابوظہبی کی عدالت کے چیف ایچ ایچ شیخ حمید بن زائید النہیان نے تُمبے گروپ کے بانی ڈاکٹر تُمبے محی الدین کو یہ ایوارڈز تفویض کیے۔ تمبے گروپ کی گلف میڈیکل یونیورسٹی کو گولڈ میڈل، دبئی تمبے ہاسپٹل ، عجمان تمبے ہاسپٹل اور فجیرا تمبے ہاسپٹل کو سلور میڈل سے نوازاگیا۔اس موقع پر ڈاکٹر تمبے محی الدین نے کہا کہ صحت اور تعلیم کے میدان میں ہماری خدمات کا اعتراف کرتے ہوئے ہمیں ایوارڈز سے نوازا گیا ہے اس سے ہماری ہمت افزائی ہوئی ہے اوراس باوقار ایوارڈ کے لئے ہمیں نامزد کرنے پر مذکورہ کمیٹی کے ہم شکر گزار ہیں۔ہم اپنے گاہکوں اور عملے کے بھی شکر گزار ہیں کہ ان کے تعاون سے ہم اس قابل ہوسکے۔اس ایوارڈ سے ہمارے اداروں کا وقار ہی نہیں بڑھایا ہے بلکہ ہمارے اسپتالوں میں بہترین علاج پانے والے مریضوں کے لئے یہ ایوارڈ ایک اعتبار اور بھروسہ کا ثبوت بن گیا ہے۔