دوحہ، 6؍ جون (ایس او نیوز؍ایجنسی) نائب صدر ایم وینکیا نائیڈو کے دورہ قطر کے درمیان بھارتیہ جنتا پارٹی کے ایک عہدیدار کی طرف سے پیغمبر اسلام کے بارے میں کئے گئے متنازعہ تبصرے پرقطر کی وزارت خارجہ نے ہندوستانی سفیر دیپک متل کو طلب کیا۔

قطر کی وزارت خارجہ نے ہندوستانی سفیر دیپک متل کو طلب کیا اور ایک سرکاری خط حوالے کیا۔ خط میں ہندوستان میں حکمراں جماعت کے ایک کارکن کی طرف سے پیغمبر اسلام اور اسلام کے خلاف کیے گئے متنازعہ ریمارکس کی مذمت کی گئی۔ مسٹر متل نے کہا کہ یہ ٹویٹس کسی بھی طرح سے حکومت ہند کے خیالات کی نمائندگی نہیں کرتے ہیں۔

قطر نے ہندوستان میں حکمراں جماعت کے اس بیان کا خیرمقدم کیا ہے جس میں ان سرگرمیوں کے لیے پارٹی عہدیداروں کی معطلی کا اعلان کیا گیا ہے۔ قطر ہندوستانی حکومت سے عوامی معافی اور ان تبصروں کی فوری مذمت کی توقع کر رہا ہے۔

قطر ایم اوایف اے کے ذریعہ جاری بیان کے تعلق سے ایک میڈیا سے ہندوستانی سفارت خانے کے ترجمان نے کہا کہ دفتر خارجہ میں ایک میٹنگ ہوئی جس میں ہندوستان میں افراد کی جانب سے مذہبی شخصیت کو بدنام کرنے والی کچھ قابل اعتراض ٹویٹس پر تشویش کا اظہار کیا گیا۔

دریں اثنا، دہلی بی جے پی میڈیا سیل کے سربراہ نوین کمار جندل کے پیغمبر محمد کے خلاف ٹویٹ سےعرب دنیا میں عدم اطمینان کی صورت حال پیداہوگئی اورہیش ٹیگ کے ساتھ ٹویٹر پر ٹرینڈ کررہے ہندوستانی مصنوعات کے بائیکاٹ کی اپیل کی گئی ہے۔