ایران نے شام میں قونصل خانے پر اسرائیلی بمباری کے جواب میں اسرائیل پر حملہ کردیا ہے۔ رپورٹوں کے مطابق ایران نے اسرائیل پر درجنوں ڈرونز اوع کروز میزائل داغے ہیں، جس کے ساتھ ہی پورے خطے میں افراتفری مچ گئی ہے۔
ایرانی حملوں کے بعد اسرائیل میں خوف کی لہر دوڑ گئی ہے، تمام اسکولز اور تعلیمی اداروں کو بند کردیا گیا ہے۔
خبروں کے مطابق ایران نے سو کے قریب ڈرونز اور کروز میزائل فائر کیے ہیں۔
اور کئی ڈرونز نے اسرائیلی شہریوں کو نشانہ بنایا ہے بتایا جارہا ہے کہ ایران اسرائیل کے پچاس فیصد اہداف کو نشانہ بنانے میں کامیاب رہا، جبکہ اسرائیلی ڈیفنس سسٹم آئرن ڈوم میزائلوں کو روکنے میں ناکام رہا، بتایا گیا ہے کہ اسرائیلی فضائی اڈے کو خیبر میزائلوں سے ٹارگٹ کیا گیا۔
اسرائیل کے سرحدی شہر حیفا میں ایمرجنسی نافذ کردی گئی ہے جبکہ پناہ گاہیں کھول دی گئیں ہیں۔
ایران کے وزیر دفاع نے ایک بیان جاری کرکے پڑوسی ممالک کو خبردار کیا ہے کہ ان میں سے جو بھی ڈرون کو روکنے کے لیے اسرائیل کے لیے اپنی فضائی حدود کھولے گا اسے نشانہ بنایا جائے گا۔
ایرانی حملے کے بعد عراق اور لبنان نے اپنی فضائی حدود کو عارضی طور پر بند کرنے کا اعلان کردیا ہے۔
ایران کے اسرائیل پر حملے کے بعد اقوام متحدہ اور سعودی عرب نے تشویش کا اظہار کرتے ہوئے فریقین سے کشیدگی نہ بڑھانے پر زور دیا ہے، جبکہ امریکا، کینیڈا، برطانیہ سمیت دیگر یورپی ممالک اسرائیل کا دفاع کرنے اور خطے میں عدم استحکام کے خطرے سے خبردار کرنے میں لگ گئے ہیں۔
رپورٹوں کے مطابق حملے میں اسرائیلی دفاعی تنصیبات اور فوجی ٹھکانوں کو نشانہ بنایا گیا ہے۔
حملے کے بعد کہا جارہا ہے کہ اسرائیلی جنگی طیاروں نے جوابی کاروائی کرتے ہوئے جنوبی لبنان پر بمباری شروع کردی ہے۔ عرب میڈیا کے مطابق لبنانی تنظیم حزب اللہ نے بھی اسرائیل پر درجنوں راکٹوں سے حملہ کیاہے۔ گولان کی پہاڑیوں پر اسرائیلی فوج کے ایئرڈیفنس ہیڈ کوارٹرز پر راکٹ داغے جانے کی بھی خبریں ہیں۔
کہا جارہا ہے کہ اسرائیل کی جانب سے ایران پر بڑے جوابی حملے کا امکان ہے، اسرائیلی وزیراعظم کے ترجمان کے مطابق اسرائیل ایرانی حملے کا منہ توڑ جواب دے گا۔
بتایا جارہا ہے کہ قبرص میں موجود برطانوی جنگی طیارے مشرق وسطیٰ روانہ ہوگئے ہیں، امریکی اور فرانسیسی جنگی طیارے بھی ایرانی ڈورنز کو نشانہ بنانے کا منصوبہ بنانے میں لگ گئے ہیں۔ خبروں کے مطابق امریکی ایئرلائن نے نیویارک سے تل ابیب کے لیے پروازیں منسوخ کردی ہیں۔