منگلورو، 10؍ مئی (ایس او نیوز) خلیجی ملکوں میں پھنسے کرناٹک کے شہریوں کو واپس لانے والی پہلی فلائٹ کی بین الاقوامی ایر پورٹ پر 12 ؍ مئی کو آمد ہوگی۔ ڈی وی سدانند گوڑا نے ہفتہ کو ٹوئٹ کیا کہ ’’ایر انڈیا فلائٹ (X0814) شام 4:10 بجے دبئی سے روانہ ہوگی اور رات 9:10 بجے منگلورو انٹر نیشنل ایر پورٹ پہنچے گی۔

مرکز کے بڑے پیمانے پر  انخلاء  کے منصوبہ کے تحت خلیجی ملکوں میں پھنسے کرناٹک کے شہریوں کے لیے کوئی فلائٹ کا انتظام نہ کرنے کی شکایت کے بعد سدانند گوڑا نے اس مسئلہ پر پر وزیر خارجہ جئے شنکر سے بات کی۔جئےشنکر نے کرناٹک کے مسافرین کے لیے خصوصی فلائٹس کا انتظام کرنے پر رضامندی ظاہر کی۔ ‘‘

خلیجی ممالک میں مقیم کرناٹک کے تقریباً 1903 ؍افراد نے  انخلاء  کی فلائٹس میں ریاست واپسی کے لیے اپنا نام درج کروایا ہے۔مرکز نے خلیجی ملکوں میں پھنسے افراد کو واپس لانے کرناٹک کے لیے دو فلائٹس کا انتظام کیا تھا۔ دوحہ سے بنگلورو کے لیے ایک اور فلائٹ کا عنقریب اعلان کیا جائے گا۔گوڑا نے یہ ٹوئٹ بھی کیا کہ ملک کے شمالی علاقوں جیسے دہلی، ہریانہ اور پنجاب میں پھنسے کرناٹک کے شہریوں کو بھی قوی درالحکومت سے بذریعہ ٹرین عنقریب واپس لایا جائے گا۔

ڈی وی سدانند گوڑا  نے  اخباری بیان میں  کہا کہ  یہ ٹرینیں ایک دو دن میں چلیں گی اور انہوں نے متعلقہ ریاستوں کے عہدیداروں کو ایک دوسرے سے تعاون کرتے ہوئے اس عمل کو سہل بنانے کی ہدایت دی۔ دہلی اور دیگر علاقوں میں پھنسے کئی کرناٹک کے شہریوں کو اپنی خود کی گاڑیوں کے ذریعہ بھی کرناٹک واپس آنے کی اجازت دے دی گئی ہے۔