بھٹکل:23/ جنوری (ایس اؤنیوز)کٹے ویرا اسپورٹس کلب بھٹکل کے زیراہتمام گروسدھیندرا کالج میدان میں سہ روزہ  اسٹیٹ لیول  کبڈی ٹورنامنٹ میں موڈبیدری کی آلواس  ٹیم نے بنگلورو کی مشہور ایم ای جی ٹیم کو فائنل میں شکست دے کر چمپئین شپ کا خطاب جیت لیا ہے۔

ہزاروں کبڈی شائقین کے درمیان دلچسپ فائنل مقابلے میں آلواس نے 23-30پوائنٹ حاصل کرتے ہوئے بنگلورو ٹیم کو7پوائنٹ سے شکست دی ۔ گرچہ آلواس کی ٹیم ابتداء میں پچھڑی ہوئی دیکھی گئی مگر پہلے ہاف کے آخر میں اپنے بہترین کھیل کے ذریعے مخالف ٹیم پر حاوی ہونے میں کامیاب ہوئی۔ آلواس کی طرف سے جسونت نے  بہترین کھیل کا مظاہرہ پیش کیا جس کی بنا پر کھیل کا دوسرا ہاف آلواس کی پکڑ میں رہا ،آلواس نے آخر تک بنگلورو ٹیم پر حاوی رہتے ہوئے چمپئین شپ کا تاج پہننے میں کامیابی حاصل کیا اور ٹروفی کے ساتھ نقد 1لاکھ روپئے کا انعام حاصل کیا۔ رنراپس کے طورپر ایم ای جی بنگلوروٹیم کو ٹروفی اور 50ہزار روپئے نقدانعام کے طورپر ملا۔ جب کہ  کٹے ویرا بھٹکل کو تیسرا مقام حاصل ہوا ۔

ایم ای جی بنگلورو کے منجوناتھ ٹورنامنٹ کے بہترین رائیڈر ، آلواس کے جسونت بیسٹ کیچر اور کٹے ویرا کے سچن گوڈا  کو بیسٹ آل رائونڈر  کے ایوارڈ سے نوازا گیا۔ سیمی فائنل میں آلواس نے سی کیو ایم ایل بنگلورو اور ایم ای جی بنگلورو نے کٹے ویرا بھٹکل کو شکست دے کر فائنل میں پہنچی تھیں۔ ٹورنامنٹ میں ریاست کے مختلف مقامات کی 16ٹیمیں شریک ہوئی تھیں۔