بھٹکل : کرناٹک میں پیر سے پہلی تا پانچویں جماعت کے کلاسوں کا ہوا آغاز؛ ریاست میں 90 فیصد اور اُترکنڑا میں 93 فیصد طلبہ کی حاضری؛ زیادہ تر والدین میں خوشی کی لہر
بھٹکل 26 اکتوبر (ایس او نیوز)ریاست کرناٹک میں کووڈ لاک ڈاون کی وجہ سے 20 ماہ سے بند پرائمری اسکولس پیر سے دوبارہ کھل گئے جس کے ساتھ ہی اکثر والدین میں خوشی کی لہر دوڑ گئی ہے۔ ریاست میں پہلے دن 90 فیصد طلبہ حاضر رہے،اسی طرح ضلع اُترکنڑا میں طلبہ کی حاضری 93.26 فیصددرج کی گئی۔
ضلع اُترکنڑا میں پہلی تا پانچویں جماعت میں جملہ 61489 طلبہ میں سے 57350 طلبہ پہلے دن اسکول میں حاضر رہے۔ اسکول بند رہنے کی وجہ سے بچوں کے لئے آن لائن کلاسس چل رہے تھے جس کے دوران بچوں کےہاتھوں میں موبائل دینا والدین کے لئے مجبوری بن گئی تھی، مگر اب اسکول کُھل جانے سے والدین بھی راحت محسوس کررہے ہیں۔
بھٹکل میں بیس ماہ بعد اسکول کھل جانے سے بچوں میں بھی خوشی کی لہر دیکھی گئی جو پورا دن گھر میں ہی رہ کر بوریت محسوس کررہے تھے۔ بھٹکل تعلقہ میں 175 سرکاری پرائمری اسکولوں میں 6615 بچے پڑھتے ہیں، نیم سرکاری یا سرکاری امداد سے چلنے والے پرائیویٹ اسکولوں (انجمن ) میں 104 جبکہ تعلقہ کے 12 پرائیویٹ پرائمری اسکولوں میں 5988 طلبہ نے داخلہ لیا ہے۔
مارچ 2020 میں کورونا وباء کی وجہ سے اسکول اور کالجس بند کردئے گئے تھے ۔ حکومت کی طرف سے پہلے مرحلہ میں کالجس اور ہائی اسکولس کھولے گئے، اس کے بعدچھٹویں سے آٹھویں کلاسوں کو کھولنے کی اجازت دی گئی تھی پھر پیر 25 اکتوبر سے پہلی سے پانچویں جماعت کے کلاسوں کو کھولنے کی اجازت دی گئی۔ سرکاری حکمنامہ کے مطابق پہلے ہفتہ کلاسس کا اہتمام صرف آدھے دن کے لئے ہوگا، 2 نومبر سے مکمل کلاسس کی بحالی کی جائے گی۔
حکومت کی جانب سے جاری کورونا گائیدلائن کے مطابق بچوں کو ماسک پہن کر حاضری دینے کی ہدایت دی گئی تھی، بھٹکل کے اسکولوں میں بچوں اور ٹیچروں کے چہرے پر ماسک دیکھا گیا، اسی طرح والدین کی طرف سے تحریری منظوری کو بھی لازمی قرار دیا گیا تھا۔ اسکولوں میں صفائی ستھرائی پر خصوصی توجہ دی گئی ہے، جبکہ پہلے دن اسکولوں میں ٹیچروں نے بچوں کا پرتپاک استقبال کیا، طلبہ کو پھول پیش کئے گئے اسی طرح اکثر اسکولوں میں بچوں کو چاکلیٹ یا بسکٹ بھی دئے گئے۔
بھٹکل انجمن آزاد پرائمری اسکول میں بچوں کا کس طرح پرتپاک استقبال کیا گیا، ایک نظر اِدھر بھی :