بینگلورو : لیڈر آف اپوزیش آر اشوک نے کہا : پرجول ریونا انتخاب جیت گیا تو اس کے خلاف قانونی کارروائی ہوگی
بینگلورو، 6 / مئی (ایس او نیوز) کرناٹکا کے لیڈر آف اپوزیشن اور بی جے پی کے اہم لیڈر آر اشوک نے کہا کہ اگر جنسی اسکینڈل کے ملزم ہاسن حلقے سے این ڈی اے کا امیدوار پرجول ریونّا اگر الیکشن جیت جاتا ہے تو اس کے خلاف قانونی کارروائی ہوگی اور اسے معطل کیا جائے گا ۔
حزب اختلاف کے قائد اشوک نے اغواء کے الزام میں پرجول کے والد ایچ ڈی ریونّا کی گرفتاری کی بھی ستائش کرتے ہوئے کہا کہ اس کے خلاف کڑی کارروائی ہونی چاہیے ۔ پرجول ریونّا اگر انتخاب جیت جاتا ہے تو اس کی پارٹی کو اس کے خلاف کڑی کارروائی کرنی چاہیے ۔ ہم بھی اس کے خلاف سخت کارروائی کریں گے ۔
آر اشوک نے کہا کہ انتخاب جیتنے کی صورت میں پرجول این ڈی اے سے رکن پارلیمان رہے گا یا جنتا دل ایس کا رکن پارلیمان رہے گا، اس تعلق سے ابھی بات واضح نہیں ہے ۔ ہم ہائی کمانڈ سے اس معاملے پر وضاحت معلوم کریں گے ۔
جے ڈی ایس اور بی جے پی کے اتحاد پر پرجول اور ایچ ڈی ریونّا جنسی اسکینڈل کے اثرات کے بارے میں پوچھے جانے پر آر اشوک نے کہا کہ ہمیں نہیں معلوم کہ کمارا سوامی اور امیت شاہ کے درمیان کیا باتیں ہوئی ہیں ۔ اتحاد جو ہوا ہے وہ مرکزی سطح پر ہوا ہے ۔ اتحاد کو جاری رکھنے یا نہ رکھنے کے بارے میں فیصلہ کرنا ہمارے بڑوں کا کام ہے ۔