کنداپور ۔ گوا قومی شاہراہ فورلین کا افتتاح اور سرسی۔ کمٹہ۔ بیلکیری شاہراہ کے لئے سنگ بنیاد
کاروار :19؍دسمبر (ایس اؤ نیوز) مرکزی وزیر نقل وحمل اور ہائی وے نتین گڈکری نے وڈیو کانفرنس کے ذریعے اترکنڑا ضلع کی قومی شاہراہ 77کے فورلین تعمیراتی کام کا آغاز کرنے کے ساتھ ساتھ 440کروڑ روپئے کی لاگت سے تعمیر کئے جانے والی سرسی ۔ کمٹہ ۔ بیلکیری قومی شاہراہ کی سنگ بنیاد رکھی ۔اس تعلق سے اترکنڑا ضلع کاروار کے ڈپٹی کمشنر دفتر میں ضلعی انتظامیہ کی طرف سے پروگرام کا اہتمام کیاگیا تھا۔
نیشنل ہائی وے اتھارٹی کی طرف سے سرسی ۔ کمٹہ ۔ بیلکیری قومی شاہراہ 766ای اور 766ای ای دونوں قومی شاہراہوں کے کناروں کی توسیع سمیت ریاست کی پانچ سڑکوں کو بھی وسعت دی جائے گی۔سنیچر کی صبح 11بجے دہلی سے مرکزی وزیر نتین گڈکری نے آن لائن کے ذریعےریاست کی کل 1197کلومیٹر لمبی، 10904کروڑ روپئے لاگت سے تعمیر کئے جانے والے 33قومی شاہراہوں کا افتتاح اور سنگ بنیاد وڈیو کانفرنس (ورچوئل نظام) کے ذریعے انجام دیا۔ان میں 20سڑکوں کی سنگ بنیاد، گوا ۔ کنداپور قومی شاہراہ 66 کے ساتھ ساتھ تین دیگر قومی شاہراہیں اور ریاست کی 5 دیگر شاہراہیں عوام کے استعمال کو سونپی جائیں گئیں ۔ یہ سبھی کام نیشنل ہائی وے اتھارٹی کے ذریعے انجام دی گئی ہیں۔ اس موقع پر ریاستی وزیر اعلیٰ بی ایس یڈیورپانے پروگرام کی صدارت کی ،مرکزی و ریاستی وزراءسمیت اعلیٰ افسران موجود تھے۔
قومی شاہراہ 66فورلین 85فی صد مکمل :قومی شاہراہ 66 جو کنداپور سے گوا کے ماجالی تک 93.700سے 283.300کل 187.240کلومیٹر لمبی فورلین کا تعمیری کام 85فی صد مکمل ہواہے۔شاہراہ کی ٹھیکداری ممبئی کی آئی آر بی کمپنی کو سونپی گئی ہے جس نے 2693کروڑ روپیوں کی لاگت سے شاہراہ کا کام تعمیری کام کررہی ہے۔کمپنی کی طرف سے ملی جانکاری کے مطابق جنوری2020تک 141کلومیٹر کاکام تکمیل کو پہنچا ہے تو دسمبر 2021میں کام مکمل ہوگا۔ گرچہ متعلقہ قومی شاہراہ کا کام پور ا ہوجانا چاہئے تھا لیکن بعض مسائل کی وجہ سے یہ ابھی تک نہیں ہوا ہے۔ کمپنی کے ساتھ 5مارچ 2013کو معاہدہ ہواتھا ، 2014مارچ 3سے کام شروع ہوا تھا۔ معاہدے کے مطابق 910دنوں میں شاہراہ کی تعمیر مکمل ہونی تھی لیکن فی الحال 85فی صد کام مکمل ہوا ہے۔ ہائی وےاتھارٹی کے مطابق یہ کام دسمبر 2021کو مکمل ہوگا ۔ دی گئی جانکاری کے مطابق اب تک 141کلومیٹر لمبی سڑک کی تعمیر ہوئی ہے، 61.262کلومیٹر لمبی اندرونی نالیوں کاکام پورا ہواہے۔ شاہراہ پر کل 28مین برج، 59چھوٹے برج ، 644کلوٹرس، 3ٹول پلازہ کی تعمیر ہوئی ہے۔ سرویس روڈ پر 49بس شلٹر اور شاہراہ کنارے 4بس شلٹر وں کی تعمیر کی گئی ہے۔
سرسی کمٹہ بیلکیری شاہراہ کی تعمیر:سرسی ۔ کمٹہ ۔ بیلکیری کی 58.92کلومیٹر لمبی قومی شاہراہ کو ترقی دیتےہوئے 440.16کروڑروپیوں کی لاگت سے تعمیر کی جائے گی جو دسمبر 2022تک مکمل ہوگی۔ بیلکیری سے 4.265کلومیٹر تک بندرگاہ کو جوڑنے والی سڑک بھی تعمیر کی جائے گی۔ یہ پروجکٹ مرکزی حکومت کے بھارت مالا منصوبے کے تحت انجام دئیے جارہے ہیں۔ متعلقہ کام کی ٹھیکداری آر این ایس انفراسٹرکچر لمیٹیڈ اور گایتری پروجکٹ کو دی گئی ہے۔
مارچ تک زمین تحویل میں :ضلعی انتطامیہ کی طرف سے کل 2.5کلومیٹر لمبی سڑک کے لئے اراضی کو تحویل میں لینا باقی ہے۔ ضلع کے ڈپٹی کمشنر ڈاکٹر ہریش کمار نے اس تعلق سے جانکاری دیتے ہوئے بتایا کہ اگلے فروری یا مارچ تک یہ کارروائی مکمل کرلی جائے گی اور اپریل تک قومی شاہراہ کا کام پوراہوگا۔