بدھ کو ہندوستان بھر میں منائی جائے گی عیدالاضحٰی ؛ سعودی عربیہ، دبئی ، عمان و دنیا کے دیگر کئی ملکوں میں آج منگل کومنائی جارہی ہے عید
بھٹکل 20 جولائی (ایس او نیوز) بھٹکل اور ریاست کرناٹک سمیت پورے ملک میں کل بدھ 21 جولائی کو عید الاضحیٰ منائی جائے گی، البتہ سعودی عربیہ، متحدہ عرب امارات، عمان، کویت اور گلف ممالک سمیت دنیا کے مختلف ممالک میں عید الاضحی آج مذہبی جوش و خروش سے منائی جا رہی ہے ۔
مسجد نبوی ﷺ اور مسجد الحرام میں نماز عید الاضحی کے روح پرور اجتماعات ہوئے ، نماز عید کے بعد امت کے اتحاد اور کورونا وائرس سے نجات کیلئے خصوصی دعائیں کی گئیں ۔ دوسری جانب حجاج کرام منیٰ پہنچ گئے جہاں بڑے شیطان کو کنکریاں ماری گئیں بعد میں حجاج کرام سنت ابراہیمی کی ادائیگی میں مصروف ر ہیں ۔
بڑے شیطان کو کنکریاں مارنے کا عمل رمی جمرات کہلاتا ہے ، رمی جمرات کا عمل طلوع آفتاب سے عیدالاضحیٰ کے پہلے دن (10 ذوالحجہ کو) سنت رسولﷺ کے مطابق زوالِ آفتاب یعنی نمازِ ظہر سے پہلے تک جاری رہتا ہے۔حجاجِ کرام اس کے بعد قربانی کرتے ہیں، احرام اتارتے ہیں اور بال کٹواتے ہیں۔
مختلف ذرائع سے ملی اطلاع کے مطابق خلیجی ممالک، مشرق وسطی، یورپ، امریکا، کینیڈا، جاپان، افغانستان کے علاوہ دنیا کے متعدد ملکوں میں آج منگل کے روز عید الاضحیٰ کا تہوار منایا جارہا ہے۔ ذرائع کے مطابق دنیا میں سب سے زیادہ مسلم آبادی والے ملک انڈونیشیامیں نماز عید آج منگل کو محدود پیمانے پر ادا کی گئی۔ یہ ملک گزشتہ کچھ عرصے سے کورونا وائرس کی بدترین لہر کی زد میں ہے۔ انڈونیشیا کے حکام نے بڑے اجتماعات پرپابندی عائد کردی تھی اور مسلمانوں کو مقامی مساجد میں نمازادا کرنے کی اجازت تھی لیکن جنوب مشرقی ایشیا کی سب سے بڑی مسجد جکارتہ کی استقلال مسجد میں عید کی نماز ادا نہیں کی گئی۔
مذہبی رہنماوں نے لوگوں سے اپنے گھروں میں ہی عبادت کرنے اور بچوں کو اپنے دوستوں کے گھروں میں نہ جانے کی اپیل کی تھی۔
ملائیشیا میں بھی کورونا کی وجہ سے عیدالاضحی محدود پیمانے پر منائی جارہی ہے۔ ملائیشیا کے وزیر اعظم محی الدین یاسین نے اپنے ایک پیغام میں لوگوں سے اپنے گھروں میں رہ کر اور اعتدال کے ساتھ عید منانے کی اپیل کی۔ انہوں نے کہاکہ ”دوسری کی جان بچانے کے لیے اپنی خواہشات کو قربان کردینا بھی اللہ کی نگاہ میں جہاد ہے۔"
ہندوستان اور پڑوسی ملک پاکستان سمیت بیشتر ممالک میں عید الاضحی کل ( بدھ کے روز) منائی جائے گی۔