بھٹکل21/جون (ایس اونیوز) دبئی کے تاجر جناب عتیق الرحمن مُنیری  کی طرف  سےچارٹرڈ فلائٹ کے ذریعے عرب امارات سے 184مسافروں کو  بھٹکل روانہ کرنے کے بعد اب پیر کو مسقط (عمان) سے  انڈین سوشیل کلب کی جانب سے ایک چارٹرڈ فلائٹ مینگلور کے لئے اُڑان بھرنے والی ہے جس میں کرناٹک کے مختلف علاقوں کے ساتھ ساتھ بھٹکل کے بھی لوگ سفر کررہے ہیں۔

مسقط سے بھٹکل مسلم جماعت  کے سرگرم رکن جناب فوزان محتشم نے بتایا کہ 180سیٹوں والی اس سلام ائیر  میں بھٹکل کے 24 لوگ سفر کررہے ہیں۔جس میں چھ بچے  بھی شامل ہیں۔ انہوں نے بتایا کہ بھٹکل مسلم اسوسی ایشن  مسقط کو   بھٹکل میں قومی سماجی ادارہ مجلس اصلاح و تنظیم  سمیت مینگلور میں بھٹکلی جماعت المسلمین کا بھی بھرپور تعاون حاصل ہے۔ مسافروں کو مینگلور ائیرپورٹ پر ناشتہ وغیرہ سمیت  انہیں بھٹکل لے جانے کے لئے مینگلور کی بھٹکلی جماعت  اپنی خدمات پیش کرے گی، بھٹکل میں تنظیم کی طرف سے  انجمن کورنٹائن سینٹر میں تمام لوگوں کو کورنٹائن کیا جائے گا۔ جناب فوزان نے بتایا کہ مسقط جماعت کی جانب سے  سماجی کارکن جناب  عثمان غنی کھومی کو بھٹکل کے قافلہ کا امیر مقرر کیا گیا ہے، جن کی سماجی خدمات کے پیش نظر  حال ہی میں انہیں جماعت کی طرف سے تہنیت بھی پیش کی گئی تھی ۔

بھٹکل انجمن کورنٹائن سینٹر کے  کنوینر  مُبین دامودی نے بتایا کہ دبئی سے کورنٹائن کئے گئے تمام لوگ آج اتوار کو  انجمن ہوسٹل سے  ریلیز ہوکر گھر جاچکے ہیں، اب یہاں مسقط کے لوگوں کو کورنٹائن کرنے کے لئے  مناسب انتظامات کئے گئے ہیں۔

یاد رہے کہ کورونا وباء کے چلتے لاک ڈاون سے  جس طرح دنیا کے مختلف ممالک میں لوگ پھنسے ہوئے ہیں،  مسقط میں بھی لوگ اپنے اپنے وطن لوٹنے کے لئے بے چین ہیں۔ 

بتایا گیا ہے کہ مسقط سے رات قریب گیارہ بجے  سلام ائیر  مینگلور کے لئے اُڑان بھرے گی اور رات قریب دو بجے فلائٹ مینگلور ائرپورٹ پر  لینڈ کرے گی۔تمام لوگوں کو بھٹکل میں ہی کورنٹائن کرنے کے لئے  ضلعی انتظامیہ نیز تعلقہ انتظامیہ سے بات چیت کی جاچکی ہے اور تمام تر انتظامات  مکمل ہوچکے ہیں۔