منگلورو:سی اے اے کی حمایت میں اجلاس عام وزیر دفاع راج ناتھ سنگھ کی شرکت۔ نیشنل ہائی وے پر ٹریفک کا رخ موڑ دیا گیا ہے۔ بھٹکل سے منگلورو سفر کرنے والے نوٹ کریں
منگلورو27/جنوری (ایس او نیوز) منگلورو میں شہریت ترمیمی قانون سی اے اے اور این آر سی کی حمایت میں اجلاس عام کا انعقاد کیا گیا ہے جس میں ملک کے وزیر دفاع راج ناتھ سنگھ شرکت کررہے ہیں۔
آج 27جنوری کوگولڈ فینچ سٹی گراؤنڈ کُلور میں یہ پروگرام 3بجے منعقد ہونے والا ہے۔ اس لئے سٹی پولیس کمشنر نے منگلورو کی طرف آنے والی موٹر گاڑیوں،مسافروں اور پروگرام کے شرکاء کو ہدایت جاری کی ہے کہ وہ منگلورو شہر میں داخلے کے لئے پولیس کی طرف سے نشاندہی کیے گئے متبادل راستے اختیار کریں۔ کاروار، بھٹکل، کنداپور وغیرہ سے منگلورو کی طرف سفر کرنے والے براہ کرم پولیس کی ہدایات کو نوٹ کرلیں۔
پولیس کی طرف سے جاری ہدایات کے مطابق اڈپی اور منگلورو سے پروگرام میں شرکت کے لئے جانے والی تمام موٹر گاڑیوں کو پارکنگ کے لئے مختص کیے گئے زون میں دوپہیہ گاڑیوں، کاروں اور بسوں کے لئے الگ الگ مقامات پر ہی پارک کیا جائے۔اس کے علاوہ عام مسافروں کوصبح ۹ بجے سے رات ۹ بجے تک اپنی گاڑیوں کو مندرجہ ذیل متبادل راستوں پر موڑنا ہوگا:
اڈپی سے بنگلورو کی طرف جانے والی تمام گاڑیوں کو پڈوبیدری سے موڑ لینا ہوگااور کارکلا، دھرمستھلا اور شیرڈی گھاٹ کا راستہ اپنا نا ہوگا۔ اسی طرح بنگلورو سے منگلورو کی طرف آنے والی تما م گاڑیوں کو میلکار سے متبادل راستے پرموڑ نا ہوگااور بی سی روڈ، کوناجے، ٹھوکٹّو سے ہوتے ہوئے منگلورو میں داخل ہونا ہوگا۔بی سی روڈ سے منگلورو کی طرف سفرکرنے والوں کے لئے کائکمبا کی طرف سے ایک اور موڑ دیا گیا ہے۔بی سی روڈ اور پمپ ویل سے آنے والی گاڑیوں کو ننتھور سے کائکمبا اور موڈ بیدری کی طرف سفر کرنا ہوگا۔کوٹارا چوکی سے جو گاڑیاں آرہی ہیں انہیں کے پی ٹی، ننتھور سے موڈبیدری کا راستہ اپنانا ہوگا۔
پولیس کمشنر نے مسافروں اور عوام سے اپیل کی ہے کہ پولیس کی طرف سے جاری کردہ ان ہدایات کی پابندی کریں اور مناسب مقامات پر اپنی گاڑیوں کو موڑ لیں، ورنہ خواہ مخواہ الجھن اور مشکل میں پھنس جانے کا اندیشہ ہے۔