منگلور9/ دسمبر(ایس او نیوز) مینگلور کی ایس ڈی ایم لاء کالج میں زیر تعلیم  بھٹکل کا فٹ بال کھلاڑی محمد رائف گنگاولی اپنی کالج کی نمائندگی کرتے ہوئے پھر ایک باربہترین پرفارمینس پیش کرکے یونیورسٹی بلیو کا خطاب جیتنے میں کامیاب ہوگیا ہے جس کے ساتھ ہی وہ اب کرناٹکا اسٹیٹ لاء یونیورسٹی ہبلی کی نمائندگی کرتےہوئے چینائی کے قریب ویلّور(تمل ناڈو) میں منعقد ہونے والے انٹر یونیورسٹی فٹ بال ٹورنامنٹ میں حصہ لینے کے لئے پہنچ گیا ہے۔

بھٹکل انجمن آرٹس سائنس اینڈکامرس کالج سے بی کام کی ڈگری مکمل کرنے کے بعد محمد رائف اب مینگلور میں ایس ڈی ایم میں سکینڈ ائیرمیں قانون کی تعلیم حاصل کررہا ہے۔ اس تعلق سے معلومات فراہم کراتےہوئے ان کے والد اور بھٹکل کے صحافی جناب محمد رضوان گنگاولی نے بتایا کہ محمد رائف بھٹکل میں بیفا ٹیم میں فٹ بال کھیلتارہاہے، جبکہ انجمن کالج میں بی کام کے چھٹویں سمسٹر کے دوران  وہ پہلی بار فٹ بال میں یونیورسٹی بلیو کے طور پر کرناٹکا یونیورسٹی دھارواڑ کی نمائندگی کرتے ہوئے انٹریونیورسٹی ٹورنامنٹ کھیل چکاہے۔

رضوان کے مطابق گذشتہ سال مینگلور ایس ڈی ایم لاء کالج جوائن ہونے کے بعد بھی وہ اپنی کالج کی طرف سے یونیورسٹی بلیو منتخب ہوا تھا، اوراب پھر ایک بار اپنی کالج سے  یونیورسٹی بلیو منتخب ہوا ہے، اس طرح بالجملہ تین مرتبہ لگاتار محمد رائف یونیورسٹی بلیو کا خطاب حاصل کرنے میں کامیاب ہوگیا ہے۔

رائف کی اس شاندار کامیابی پربھٹکل بیفا اسپورٹس کے ساتھ ساتھ بھٹکل مسلم یوتھ فیڈریشن نے انہیں مبارکباد پیش کی ہے اورمستقبل میں بھی بہترین کھیل کا مظاہرہ جاری رکھنے اور بھٹکل کا نام روشن رکھنے کی اُمید ظاہر کی ہے۔