بھٹکل مسلم یوتھ فیڈریشن کے زیراہتمام سہ روزہ عوز پرو کبڈی ٹورنامنٹ کا شاندار آغاز؛ سخت ترین مقابلے، شائقین کبڈی نے اُٹھایا بھرپور لطف
بھٹکل 13 مارچ (ایس او نیوز) بھٹکل مسلم یوتھ فیڈریشن کے زیراہتمام عوز پروکبڈی ٹورنامنٹ کا جمعہ بعد نماز عصر شاندار آغاز ہوا جس میں مختلف ٹیموں کے مابین منعقدہ مقابلے بے حد سخت رہے۔ ٹورنامنٹ کے میچس سے لطف اندوز ہونے ہزاروں لوگوں کی بھیڑ وائی ایم ایس اے میدان میں دیکھی گئی، جبکہ ہزاروں لوگوں نے ساحل آن لائن کے یو ٹیوب چینلس سے بھی مقابلوں کا راست ٹیلی کاسٹ دیکھا۔
ابتدائی میچ شام پانچ بجے شروع ہونے والا تھا، مگر کافی تاخیر یعنی قریب 5:45 بجے شروع ہوا۔ اول میچ نے ہی اشارہ دیا کہ ٹورنامنٹ کس طرح دلچسپ اور مزے دار ہوگا۔ حسب اعلان مغرب اورعشاء کے درمیان کوئی میچ نہیں کھیلا گیا، جس کے بعد رات قریب نو بجے سے دوسرا سیشن شروع ہوا جو رات قریب بارہ بجے تک چلا۔
بارہ ٹیموں پر مشتمل ٹورنامنٹ میں ٹیموں کے دو گروپ بنائے گئے ہیں، گروپ اے میں ظہیر اور فوزان آرمار کی چوکستان، عبدالعظیم ڈی ایف کی خلیفہ پلٹن، فواز شاہ بندری کی عنایت اللہ فین کلب، طٰحہ صدیق کی کے کے ایم ٹور اینڈ ٹراویلس (کے ایم ٹی ٹی)، عبدالبدیع مُنیری کی عوز اسٹرائکرس اورمستقیم کی بھائی جان، جبکہ گروپ بی میں محسن ایس بی کی ایمباسی رائیڈرس، ارشاد رکن الدین کی بھٹکل ورئیرس،مسعود شینگیری کی بھٹی ٹریڈنگ کمپنی، منال کے ایم کی القیس، آرباز رکن الدین کی پٹیل ورئیرس اور آصف مُلا کی بیک اینڈ شیک ٹیم شامل ہیں۔
پہلے میچ میں بھائی جان نے عوز اسٹرائکرس کو، دوسرے میچ میں ایمباسی رائیڈرس نے بھٹکل ورئیرس کو، تیسرے میچ میں خلیفہ پلٹن نے چوکستان کو چوتھے میچ میں بھٹی ٹریڈنگ نے ایک سخت ترین مقابلے میں القیس کو پانچویں میچ میں کے ایم ٹی ٹی نے عنایت اللہ فین کلب کو ، چھٹے میچ میں بیک اینڈ شیک نے پٹیل ورئیرس کو اور ساتویں میچ میں عوز اسٹرائیکرس نے چوکستان کو شکست دی۔
آج ٹورنامنٹ کے دوسرے دن آٹھواں میچ ایمباسی رائیڈرس اور القیس کے درمیان ہوگا جبکہ دوسرے کورٹ میں نواں میچ خلیفہ پلٹن اور عنایت اللہ فین کلب کے درمیان ہوگا۔ میچس کا مکمل شیڈول یہاں پیش کیا جارہا ہے۔
ٹورنامنٹ کی افتتاحی تقریب رات قریب گیارہ بجے منعقد ہوئی جس میں فیڈریشن کے تعلق سے مکمل تعارف ، خدمات اور سرگرمیوں سے ذمہ داران سمیت کھلاڑیوں کو بھی آگاہ کیا گیا۔ اس موقع پر مہمان خصوصی کے طور پر تشریف فرما دبئی کے معروف بزنس مین اور کورونا ورئیر کے طو رپر پہنچانے جانے والے جناب عتیق الرحمن مُنیری نے بھٹکل مسلم یوتھ فیڈریشن کی خدمات کے اعتراف میں اپنی ایک ایمبولنس فیڈریشن کے حوالے کرنے کا اعلان کیا ۔ اس موقع پر مجلس اصلاح و تنظیم کے صدر ایس ایم پرویز، بھٹکل مسلم جماعت دبئی کے سابق جنرل سکریٹری رحمت اللہ راہی، بھٹکل کمیونٹی جدہ کے سابق جنرل سکریٹری قمر سعدا، کبڈی فیڈریشن کے اہم ذمہ دار شری دھر نائک، عنایت اللہ شاہ بندری سمیت فیڈریشن کے اہم ذمہ داران موجود تھے۔ فیڈریشن صدر عزیز الرحمن رکن الدین ندوی نے تقریب کی صدارت کی۔
