بھٹکل : کووڈ ویکسین کی قلت سے خلیجی ممالک جانے والوں کے لئے درپیش ہیں مشکلات ۔ سر پر منڈلا رہا ہے ملازمت سے ہاتھ دھونے کا خطرہ
بھٹکل،2؍ جون (ایس او نیوز) بھٹکل کے بہت سے غیر رہائشی ہندوستانی جو زیادہ تر خلیجی ممالک سے چھٹی پر گھر آئے ہوئے تھے ان کے لئے واپس بیرونی ممالک کا سفر کرنا ایک تو فلائٹس نہ ہونے کی وجہ سے مشکل ہوگیا ہے تو دوسری طرف کووڈ ویکسین کی قلت نے سفر کو ناممکن بنادیا ہے۔
اس وقت سعودی عربیہ نے رہائشی اورغیر رہائشی باشندوں کے لئے ملک میں داخلے کے لئے گائڈ لائنس جاری کردئے ہیں جس کے تحت غیر رہائشی باشندوں کے لئے سفر سے پہلے کووڈ ویکسین کے دونوں ڈوز لینا لازمی قرار دیا گیا ہے۔ اب اگر عام لوگوں کے لئے حکومت کی طرف سے ویکسین کا سلسلہ دوبارہ شروع کیا بھی جاتا ہے تو پہلے دوسرا ڈوز لگانے کا نمبر تین اور چار مہینے بعد آنے کی توقع جتائی جارہی ہے۔ ایسی صورت میں ویزا ختم ہونے اور ملازمت سے ہاتھ دھو بیٹھنے کا سب سے بڑا خطرہ لوگوں کے سر پر منڈلانے لگا ہے۔
سعودی عربیہ کی حکومت نے جو فرمان جاری کیا ہے اس کے مطابق 'ہائی رسک' (بڑے خطرے) والے ممالک میں ارجنٹینا، برازیل، مصر، انڈونیشیا، لبنان، جنوبی افریقہ اور ترکی کے علاوہ پاکستان اور ہندوستان بھی شامل ہے۔ اس طرح دنیا کے بقیہ ممالک 'لو رِسک' زمرے میں شامل کیے گئے ہیں ۔
ہندوستان سمیت تمام 'ہائی رِسک' والے ممالک سے سعودی عربیہ میں داخل ہونے والوں کے سعودی باشندوں کے لئے اورغیر رہائشی باشندوں کے لئے دو الگ الگ زمرے بنائے گئے ہیں ۔ ان زمروں کے لئے ملک میں داخلہ کی جو شرائط اس وقت جاری کی گئی ہیں، اس کے مطابق غیر سعودی باشندوں کے لئے ویکسینیشن کے دونوں ڈوز لینے کے باوجود سعودی میں براہ راست داخل ہونے کی اجازت نہیں رہے گی۔
ایسے لوگوں کو پہلے کسی 'لو رِسک' (کم خطرے) والے زمرے میں شامل ملک میں 14 دن تک قیام کرنا ہوگا۔ اگر وہ شخص ویکسینیشن کے دونوں ڈوز لے چکا ہے تو اس 'لو رسک' والے ملک سے سعودی کے لئے طیارہ میں سوار ہونے سے 72 گھنٹوں کے اندر حاصل کی گئی پی سی آر کووڈ نگیٹیو رپورٹ ساتھ میں رکھنا ضروری ہوگا۔ ایسے افراد کے لئے سعودی میں داخل ہونے کے بعد پھر پی سی آر ٹیسٹ یا کوارنٹین میں رہنے کی کوئی ضرورت نہیں رہے گی۔
اگر ان میں سے کسی نے ویکیسین کا صرف ایک ڈوز لیا ہے یا پھر کووِڈ میں مبتلا ہوکر صحت یاب ہوا ہے تو اسے بھی 'لو رسک' والے ملک سے سعودی کے لئے سفر سے شروع کرنے سے پہلے 72 گھنٹو٘ں کے اندر حاصل کی گئی پی سی آر نگیٹیو رپورٹ ساتھ میں لانا لازمی ہوگا۔ پھر سعودی میں داخلے کے بعد تین دن تک ہوم کوارنٹین میں رہنا ہوگا اور سعودی میں داخلے کے دوسرے دن پی سی آر ٹیسٹ کروانا ہوگا۔
اگر ان میں ایسے افراد ہیں جنہوں نے ویکسنیشن نہیں کروایا ہے تو انہیں 'لو رسک' والے ملک سے سعودی عرب کے لئے سفر شروع کرنے سے پہلے 72 گھنٹوں کے اندر حاصل کی گئی پی سی آر نگیٹیو رپورٹ ساتھ میں لانا ہوگا۔ پھر سعودی میں داخلہ کے بعد انسٹی ٹیوشنل کوارنٹین کی مدت پوری کرنی ہوگی ۔ اسی کے ساتھ سعودی میں داخلہ کے پہلے دن اور ساتویں دن پی سی آر ٹیسٹ کروانا ہوگا۔
بھٹکل میں اس وقت سیکڑوں غیر رہائشی ہندوستانی باشندے موجود ہیں جو چھٹیاں گزارنے کے لئے گھر آئے تھے ۔ اسی دوران لاک ڈاون شروع ہوگیا اور فلائٹس منسوخ ہوگئیں۔ جس کے چلتے سعودی عرب نے کٹھن شرائط کا اعلان کردیا ، بتایا جارہا ہے کہ سعودی کے بعد اب دیگر عرب ممالک بھی اس قسم کی شرائط جاری کر سکتے ہیں۔ اس صورت حال سے خلیجی ممالک کی طرف اپنے ملازمت کے لئے سفر کرنے کے خواہشمند افراد بہت زیادہ پریشان ہوگئے ہیں۔ ہر دن ویکسینیشن لگوانے کے لئے لوگ سرکاری تعلقہ ہاسپٹل کے چکر لگا رہے ہیں اور خالی ہاتھ واپس لوٹ رہے ہیں۔ ایسے لوگوں کی طرف سے یہ مانگ کی جارہی ہے کہ جس طرح کووڈ واریئرس اور فرنٹ لائن ورکرز کے زمرے بنا کر حکومت ترجیحی بنیاد پر لوگوں کو ویکسین دے رہی ہے، اسی طرح بیرونی ممالک میں ملازمت کرنے والوں کو بھی ترجیح دے اور ان کا خصوصی زمرہ بنا کر ویکسینیشن دینے کی سہولت فراہم کی جائے۔
اس معاملے پر جب ضلع ڈپٹی کمشنر مولئی موہیلن سے پوچھا گیا تو انہوں نے بتایا کہ فی الحال تعلقہ اسپتال میں عام زمرے کے لئے ویکسین دستیاب نہیں ہے۔ جیسے ہی ویکیسین کا نیا اسٹاک موصول ہوگا تو دستاویزات پیش کرنے پر غیر رہائشی ہندوستانیوں کے لئے پہلی ترجیج کے ساتھ ویکسینیشن کیا جائے گا۔