انجمن گرلز کے ساتھ انجمن بوائز کی سکینڈ پی یو میں شاندار کامیابی پر جدہ جماعت نے کی ستائش؛ دونوں پرنسپالوں کوفی کس پچاس ہزار روپئے انعام
بھٹکل 24 اپریل (ایس او نیوز) انجمن گرلز پی یو کالج کے ساتھ ساتھ انجمن بوائز پی یو کالج کے سکینڈ پی یو سی میں قریب97 فیصد نتائج آنے پربھٹکل کمیونٹی جدہ نے دونوں کالجوں کے پرنسپال اور اساتذہ کی نہ صرف ستائش اور تہنیت کرتے ہوئے سپاس نامہ پیش کیا، بلکہ ہمت افزئی کے طور پر دونوں کالجوں کے پرنسپالوں کو فی کس پچاس ہزار روپئے کا چیک بھی پیش کیا۔
بتاتے چلیں کہ اِس بارانجمن پی یو کالج (فور بوائز) کی کامیابی کی شرح 97.84 فیصد جبکہ انجمن پی یو کالج (فور گرلز) کی کامیابی کی شرح 96.74 فیصد درج کی گئی ہے۔
بدھ کو انجمن ہال میں منعقدہ تہنیتی پروگرام سے خطاب کرتے ہوئے بھٹکل مسلم کمیونٹی جدہ کے صدر جناب قمر سعدا نے اس بات پر نہایت خوشی کا اظہار کیا کہ انجمن کالج تعلیمی میدان میں کافی ترقی کررہا ہے اور نتائج میں سال درسال بہتری دیکھی جارہی ہے۔ انہوں نے کہا کہ گذشتہ سال بھی جدہ جماعت کی طرف سے بوائز اور گرلز پی یو کالجوں کے پرنسپالوں کو فی کس پچاس ہزار روپئے کا انعام پیش کیا گیا تھا، اِس بار نتائج مزید بہتر آئے ہیں، مگر ہم چاہتے ہیں کہ پی یو سی میں انجمن کی کامیابی صد فیصد ہو۔ جس کے لئے پرنسپال سمیت انجمن کے تدریسی اسٹاف کو مزید محنت کرنے کی ضرورت ہے۔
جدہ جماعت کے سابق صدر جناب عبدالسلام دامداابو نے کہا کہ گذشتہ سال جب پی یو سی میں انجمن کے نتائج میں بہتری دیکھی گئی تو ہم نے اُسی وقت جماعت کی طرف سے فیصلہ لیا کہ ہمیں اپنے قومی ادارہ کی حوصلہ آفزائی کرنی چاہئے جس کے بعد ہماری انتظامیہ نے دونوں پرنسپالوں کو پچاس پچاس ہزار روپئے انعام سے نوازنے کا فیصلہ کیا۔ یہی وجہ ہے کہ اس بار انجمن کی کامیابی میں مزید اضافہ ہوا ہے ، لیکن ہمارا نشانہ صد فیصد کامیابی حاصل کرنا ہے۔ عبدالسلام صاحب نے انجمن بوائز پی یو کالج کے شعبہ سائنس میں سو فیصد نتائج پر نہایت مسرت کا اظہار کرتے ہوئے پرنسپال یوسف کولا کی ستائش کی اور کہا کہ پہلی بار انجمن کو اتنی بڑی کامیابی نصیب ہوئی ہے، اسی طرح انہوں نے انجمن پی یو کالج فورگرلز کی پرنسپال ڈاکٹر فرزانہ محتشم کی بھی ستائش کی ، جہا ں کے نتائج ہمیشہ سے بہترین رہے ہیں۔اس موقع پر انہوں نے جدہ جماعت کی جانب سے پی یو سائنس (بوائز) کے نتائج صد فیصد آنے پر لیکچررس کے لئے بھی الگ سے جماعت کی طرف سے خصوصی انعامات کا اعلان کیا۔
جماعت کے سابق جنرل سکریٹری جناب عُبیداللہ عسکری نے انجمن کالج پرنسپال کےساتھ ساتھ انجمن انتظامیہ کی بھی ستائش کی اور کہا کہ انجمن کی اس شاندار کامیابی کے لئے جس طرح انجمن کے اساتذہ ،لیکچررس اور طلبہ و طالبات کی محنت ذمہ دار ہے، اسی طرح انجمن کے عہدیداران اور انتظامیہ کا بھی بڑا اہم رول ہے ۔
انجمن حامئی مسلمین کے نائب صدر جناب محمد صادق پلور نے پروگرام کی نظامت کرتے ہوئے بتایا کہ انجمن گرلز کالج کے نتائج ہمیشہ قابل ستائش رہے ہیں اور ہماری لڑکیاں اکثر لڑکوں پر بھاری پڑتی رہی ہیں، مگر اِس بار انجمن بوائز کے جو نتائج سامنے آئے ہیں، ہمیں نہایت خوشی محسوس ہورہی ہے کہ اب لڑکے لڑکیوں پر بازی ماررہے ہیں، اب انجمن بوائز کالج، گرلز کالج کے مقابلے پر آگیا ہے، لہٰذا آئندہ دونوں کالجوں کے درمیان مقابلہ ہوگا، اور ہمیں اُمید ہے کہ انجمن کے طلبہ و طالبات دونوں کو ہی اس کا بھرپور فائدہ پہنچے گا۔
اپنے تاثرات پیش کرتے ہوئے انجمن گرلز پی یو کالج کی پرنسپال ڈاکٹر فرزانہ محتشم نے اس بات پر نہایت مسرت کا اظہار کیا کہ جدہ جماعت نے ہماری خدمات کی ستائش کی اورہماری ہمت بڑھائی۔ انہوں نے لڑکیوں پر مزید محنت کرنے اور نتائج صد فیصد لانے ہرممکن کوشش کرنے کا تیقن دیا۔ انجمن بوائز پی یو کالج کے پرنسپال جناب یوسف کولا نے بھی اپنے تاثرات پیش کرتے ہوئے جدہ جماعت کا شکریہ ادا کیا۔
انجمن حامئی مسلمین بھٹکل کے جنرل سکریٹری جناب اسحاق شاہ بندری جو قریب چالیس سال تک سعودی عربیہ میں ہی برسرروزگار تھے اور 2016 میں بھٹکل لوٹنے سے قبل جدہ جماعت کے جنرل سکریٹری اور صدر کے عہدہ کے ساتھ جماعت کی سرپرستی بھی کر چکے ہیں۔ اپنے تاثرات پیش کرتے ہوئے بتایا کہ جدہ جماعت تعلیم کے معیار کو بہتر کرنے اور تعلیم کے میدان میں قوم و ملت کے نونہالوں کو آگے بڑھانے ہمیشہ سے فکرمند رہی ہے۔ گذشتہ سال کی طرح اِس بار بھی بھٹکل کمیونٹی جدہ نے پی یو سی دوم میں انجمن کی شاندار کامیابی پر کالج کے پرنسپالوں کی تہنیت کرتے ہوئے انہیں انعام و اکرام سے نوازا تھا، اِس باربھی جدہ جماعت نے اپنی سابقہ روایات کو برقرار رکھاہے، جس پر انجمن حامئی مسلمین جدہ جماعت کی شکرگذار ہے۔ دونوں پرنسپالوں کو تہنیت پیش کرنے سے پہلے جدہ جماعت کے سرگرم رکن جناب شعیب کوٹیشور نے تہنیت نا مہ پڑھ کر سنایا۔
اس اہم تہنیتی پروگرام میں اراکین انتظامیہ کی تعداد بے حد کم رہی، جس پر جدہ جماعت کے ذمہ داران نے ناگواری کا اظہار کیا، البتہ مختصر پروگرام میں انجمن کے نائب صدر (دوم) ڈاکٹر زُبیر کولا، ایڈیشنل سکریٹری ڈاکٹر افتاب قمری، BBA BCA پروفیشنل کالج بورڈ سکریٹری : جناب احید محتشم، پی یو اینڈ ڈگری کالج بورڈ سکریٹری: ڈاکٹر ایس ایم سید سلیم، ہائی اسکول بورڈ سکریٹری : جناب سعداللہ رکن الدین، دینیات بورڈ سکریٹری : مولانا ڈاکٹر عبدالحمید اطہررکن الدین ندوی اور کالج بورڈ سکریٹری ڈاکٹر ایس ایم سید سلیم سمیت بعض دیگر اراکین انتظامیہ بھی موجود تھے۔