بھٹکل مسلم جماعت مسقط کے زیراہتمام کونٹی کرکٹ ٹورنامنٹ کا شاندار انعقاد؛ راتوں رات ٹورنامنٹ کا آیا نتیجہ
بھٹکل 8/اکتوبر(ایس او نیوز) بھٹکل مسلم جماعت مسقط کے زیراہتمام کونٹی کرکٹ ٹورنامنٹ کا گذشتہ رات شاندار انعقاد کیا گیا، 12 ٹیموں پر مشتمل یہ ٹورنامنٹ راتوں رات مکمل کرکے صبح کی اولین ساعتوں میں جیت درج کرنے والی ٹیموں کو انعامات سے نوازا گیا۔
ٹورنامنٹ کی شروعات جمعرات 5/اکتوبر رات نو بجے ہوئی تھی، پانچ اووروں والے اس ٹورنامنٹ کے سیمی فائنل میں ویکینڈ چمپئن، اسٹریٹ گیٹ، رویل نوائط اور روی جونئیرس پہنچنے میں کامیاب ہوئیں۔ دلچسپ اور تفریح بخش میچس کے بعد فائنل میں ویکینڈ چمپئن نے اسٹریٹ گیٹ کو 13 رنوں سے شکست دیتے ہوئے ٹورنامنٹ اپنے نام کرلیا۔ فاتح ویکینڈ چمپئن کو 125 ریال نقد انعام کے ساتھ خوبصورت ٹرافی انعام میں دی گئی جبکہ رنرزآپ اسٹریٹ گیٹ کو سو ریال کے ساتھ ٹرافی سے نوازا گیا۔ رویل نوائط کو ٹورنامنٹ میں تیسرا مقام ملا۔ فائنل میں بہترین کارکردگی کا مظاہرہ کرنے والے اسماعیل رکن الدین کو مین آف دی میچ کے اعزاز سے نوازا گیا۔ پورے ٹورنامنٹ میں بہترین کھیل کا مظاہرہ پیش کرنے والے بلال کو مین آف دی سیریز، عبدالباری ائیکری کو بیسٹ بیٹسمین، عبدالمغنی شینگیری کو بیسٹ باولر اور مجتبیٰ چامنڈی کو بیسٹ فیلڈر کے اعزاز سے نوازا گیا۔ دلچسپ بات یہ رہی کہ جمعہ صبح 4:30 بجے تک فائنل تقریب اختتام کو پہنچ گئی۔
بھٹکل کے اکثر نوجوان اپنی پڑھائی ختم کرتے ہی کھیلنے کودنے کی عمر میں خلیجی ممالک میں روزگار کی تلاش میں نکل پڑتے ہیں، جس کو دیکھتے ہوئے گلف کی اکثر جماعتیں ایسے نوجوانوں کے لئے اپنی جماعت کے زیراہتمام کھیلوں کا انعقاد کرتے ہیں اور انہیں جماعت کے ساتھ جوڑ کر جماعتی سرگرمیوں میں بھی شریک کراتے ہیں۔ اسی مقصد کے تحت بھٹکل مسلم جماعت مسقط نے اس ٹورنامنٹ کا انعقاد کیا تھا جس میں مسقط کے مختلف علاقوں میں رہائش پذیر بھٹکلی نوجوانوں نے ٹورنامنٹ میں شریک ہوتے ہوئے کھیل کا بھرپور لطف اُٹھایا وہیں دیگر بھٹکلی حضرات بھی ان میچس سے لطف اندوز ہونے کے لئے میدان میں موجود رہے اور نوجوانوں کی خوب حوصلہ آفزائی کی۔
ٹورنامنٹ کا آغازمولانا افضل گوائی کی تلاوت کلام پاک سے ہوا۔ جماعت کے صدر جناب نثار ایم جے اور جنرل سکریٹری جناب سید حسن برماور ٹورنامنٹ کی شروعات سے لے کر اختتام تک میدان میں موجود تھے، ساتھ ساتھ جماعت کے قریب 500 اراکین بھی کرکٹ کا لطف اُٹھانے الموج گراونڈ میں موجود تھے۔ ٹورنامنٹ کو بہترین انداز میں آرگنائز کرنے کے لئے جماعت کے شعبہ اسپورٹس کے چئیرمین جناب سعد لونا اور نائب چئیرمین جناب ربیع احمد ائیکری سمیت ان کی پوری کمیٹی پیش پیش تھی ۔
بتاتے چلیں کہ ٹورنامنٹ میں جملہ بارہ ٹیموں نے حصہ لیا تھا جن کے نام اس طرح ہیں: روی جونئیر (کپتان عبدالہادی)، رویل نوائط (کپتان سید اسماعیل زیاد)، الخویر نوائط (کپتان دیّان)، ایضان ورئیرس (کپتان امتیاز)، محتشم (کپتان جسّاد سعدا)، سیب نوائط (کپتان ذوالنور)، نمّا بھٹکل (کپتان ماویہ)، ویکینڈ چمپئن (کپتان شمویل)، نوائط ورئیر (کپتان عبدالرحمن واگا)، اسٹریٹ گیٹ (کپتان انیس مٹّا) اور سیب چمپئن (کپتان عبدالباری بندو)