ریاض کے بعد دمام اور جدہ بھٹکلی جماعتوں نے بھی ممبران سے کی ووٹنگ میں حصہ لینے کی اپیل؛ فری ائیرٹکٹ کی بھی پیشکش
بھٹکل 28/اپریل (ایس او نیوز) لوک سبھا انتخابات کے تیسرے مرحلے میں بھٹکل اور اُترکنڑا میں 7/مئی کو ووٹنگ ہوگی ، یعنی وقت بالکل کم بچا ہے۔ ایسے میں ایک طرف بھٹکل اسوسی ایشن ریاض نے پہل کرتے ہوئے اپنے ممبران کے لئے جماعت کی طرف سے ائیر ٹکٹ کا اعلان کیا، وہیں دوسری طرف لوک سبھا انتخابات کی سنگینی کو دیکھتے ہوئے بھٹکل مسلم جماعت منطقۃ الشرقیہ (دمام) اور بھٹکل کمیونٹی جدہ نے بھی اپنے اپنےممبران کو انتخابات میں شریک ہونے کی اپیل کرتے ہوئے ووٹنگ کے لئے انڈیا جانے کے خواہشمندوں کو ائیرٹکٹ فراہم کرنے کی پیش کش کی ہے۔
پتہ چلا ہے کہ گلف کی مختلف شہروں میں قائم بھٹکلی جماعتوں کی طرف سے جماعت کے اراکین میں لوک سبھا انتخابات کو لے کر بیداری پیدا کرنے کی کوشش کی جارہی ہے اور اُنہیں انڈیا جاکر ووٹنگ میں شریک ہونے کی درخواست کی جارہی ہے، جس کے لئے جماعت کی طرف سے فری ائیر ٹکٹ کی بھی پیش کش کی جارہی ہے، ایسے میں سمجھا جارہا ہے کہ اِس بار کے انتخابات میں گلف سے کثیر تعداد میں بھٹکلی حضرات ووٹنگ کرنے بھٹکل پہنچیں گے۔
یاد رہے کہ ملک کے حالات کو دیکھتے ہوئے جس طرح اپوزیشن کی تمام پارٹیاں سیکولرجمہوری اقدار کو باقی رکھنے اور فسطائی طاقتوں کی سازشوں کو ناکام بنانے کے لئے متحد ہوگئی ہیں، اسی طرح جمہوریت، سیکیولرزم اور امن و سلامتی پر یقین رکھنے والے ملک کے شہری بھی ان انتخابات کو ایک جنگ کی طرح دیکھ رہے ہیں جسے ہر حال میں جیتنا ضروری ہے سمجھا جارہاہے کہ اگر ان انتخابات میں بھی گذشتہ دو انتخابات کی طرح مسلم مخالف پارٹی اقتدار پر آتی ہے تو پھر ظلم و استبداد کا ایسا دور شروع ہونے کے امکانات ہیں جس سے پیچھا چھڑانا ممکن نہیں ہوسکے گا۔
یہی وجہ ہے کہ اِس بار کے انتخابات کو لے کر مسلم اور مسلم سماجی ادارے بھی بے حد متحرک ہوگئے ہیں، خاص کر پہلے مرحلے کے انتخابات کے بعد وزیراعظم نریندر مودی نے جس طرح کے مسلم مخالف اور اشتعال انگیز بیانات دئے ہیں ، اُس کو لے کرملک کے مسلمانوں میں بہت زیادہ تشویش پائی جارہی ہے۔
سعودی عربیہ کی متحرک سمجھی جانے والی تینوں بھٹکلی جماعتوں کی طرف سے اپنے اراکین کے لئے فری ٹکٹ کا اعلان کئے جانے کے بعد اب گلف کی دیگر بھٹکلی جماعتیں اور ہندوستان کے مختلف شہروں کی بھٹکلی جماعتیں اس الیکشن کو لے کر کس طرح کی منصوبہ بندی کرتی ہے، یہ دیکھنا دلچسپ ہوگا۔