بھٹکل:21؍ اکتوبر(ایس اؤ نیوز) ہفتہ بھر میں مسلسل تین چار چھٹیاں ملنے سے سیاحتی مرکز مرڈیشور میں سیاحوں کی بھیڑ جمع ہوگئی ہے، دور سے نظارہ کرنے پر سمندر کنارے پر عوام چیونٹیوں کی طرح نظر آتے ہیں۔
سرکاری سطح پر مختلف چھٹیوں کی وجہ سے مرڈیشور میں سیاحوں کی آمد میں مسلسل اضافہ ہوتا جارہے۔ مندر میں بھی ہزاروں بھگت پوجا کے لئے کھڑے نظر آرہے ہیں تو کنارے پر ہزاروں لوگوں کی چہل پہل سے مرڈیشور تہوار کے جشن میں ڈوبا ہواہے۔ سبھی لاڈج فل ہونے سے کمروں کے کرایہ میں تین چار گنا اضافہ دیکھا گیا ہے۔ بارش میں بیوپار سے کنگال ہوٹلوں اور دکانوں پر زبردست خرید فروخت ہونے لگی ہے اور باکڑا دکانوں کی تو عید ہوگئی ہے۔ سمندر میں بوٹنگ کو فرصت نہیں ہے ، اسی دوران سمندر میں تیرنےوالے سیاحوں کی نگرانی اورحفاظت بھی ایک مسئلہ ہےالبتہ لائف گارڈ کڑی نظر رکھے ہوئےہیں۔
ٹرافک نظام متاثر :مرڈیشور کو سیاحوں کی آمد میں کثرت ہونےکی وجہ سے ٹرافک نظام متاثر ہواہے اور سواریوں کی پارکنگ ایک بڑا مسئلہ بن گئی ہے۔ پارکنگ کا نظام نہ ہونے کار، ٹمپو وغیرہ سمندری کناروں پر ہی ٹھکانہ ڈالے ہوئےہیں۔ راہ گیروں اور بائک سواریوں کو سڑک سے گزرنے میں بھی کافی دقتیں دیکھی گئیں۔ سواریوں سے سڑکیں اتنی گنجان ہوگئی ہے کہ 200-300 میٹر کا راستہ طئے کرنے کے لئے آدھے گھنٹے سے بھی زیادہ کا وقت لگ رہاہے۔ بستی سے مرڈیشور جانےو الی سڑک پر جہاں تہاں اندرونی نالیوں کے لئے کھودے گئے گڑھے یوں ہی کھلے چھوڑدئیےجانے سے مسافروں اور سواریوں کو آگے بڑھنے میں کافی دشواریاں پیش آرہی ہیں۔ پولس اہلکاروں کی اکثریت ٹرافک نظام کی دیکھ ریکھ اور پارکنگ کی نگرانی میں ہی حیران پریشا ن ہورہے ہیں۔ اولگا منٹپ سے مرڈیشور مندر تک سواریوں کو آہستہ آہستہ آگے جانے کےلئے راستہ بنانا ہی پولس کا روز کا کام ہوگیا ہے۔
ترقیاتی کاموں میں دیری :ہرسال مرڈیشور آنے والے سیاحوں کی تعداد میں اضافہ دیکھا جارہاہے۔ مرڈیشور کی ترقی کےلئے جاری کئے گئےکاموں کی تکمیل میں دیری ہونےسے مزید مسائل جنم لے رہےہیں۔ سڑک، اندرونی نالیاں ، پارکنگ جیسے مسائل سیاحتی مرکز مرڈیشور کی شہرت کو گہن لگا رہے ہیں۔ عوامی سطح پر کہا جارہاہےکہ مقامی انتظامیہ ایک حتمی اور مستحکم فیصلہ لینےمیں ناکام ہے، اسی لئے مرڈیشور میں نت نئے مسائل پیدا ہونےکا الزام لگایا ہے۔