بھٹکل سنڈے مارکیٹ: بیوپاریوں کا سڑک پر قبضہ - ٹریفک کے لئے بڑا مسئلہ
بھٹکل ،2/ اپریل (ایس او نیوز) شہر بڑا ہو یا چھوٹا قصبہ ہفتہ واری مارکیٹ عوام کی ایک اہم ضرورت ہوتی ہے، جہاں آس پاس کے گاوں، قریوں سے آنے والے کسانوں کو مناسب داموں پر روزمرہ ضرورت کی چیزیں اور خاص کرکے ترکاری ، پھل فروٹ جیسی زرعی پیدوار فروخت کرنے اور عوام کو سستے داموں پر اسے خریدنے کا ایک اچھا موقع ملتا ہے اور یہ سلسلہ پرانے زمانے سے چلا آ رہا ہے ۔
بھٹکل میں یہ ہفتہ واری، سنڈے یا سنتے مارکیٹ پہلے قدیم بس اسٹینڈ کے پاس مچھلی مارکیٹ سے متصل اُس جگہ پر لگتی تھی جہاں اِس وقت مرغی اور ترکاری کی باضابطہ دکانیں موجود ہیں ۔ پھر شہر جیسے جیسے پھیلتا گیا اور آبادی بڑھتی گئی یہ مارکیٹ بہت چھوٹی پڑ گئی تو سرکاری ہاسپٹل کے قریب میدان میں سنڈے مارکیٹ کو منتقل کیا گیا ۔ وہاں پر کسانوں اور کاروباریوں کو پختہ شیڈس بنا کر دئے گئے تا کہ وہ اطمینان سے اپنا بیوپار کر سکیں اور عوام بھی یکسوئی سے خریداری کر سکیں ۔
لیکن اب بھٹکل کی یہ سنڈے مارکیٹ قریبی دیہاتوں اور قصبوں سے آنے والے کسانوں کے بجائے بڑے بیوپاریوں کا اڈہ بن کر رہ گئی ہے جو سنیچر کی شام سے ہی مارکیٹ کے شیڈس اور کھلے احاطے پر اپنا قبضہ جما لیتے ہیں اور اس کا نتیجہ یہ ہوتا ہے کہ صبح سویرے قریبی دیہاتوں سے آنے والے کسان اپنا مال فروخت کرنے کے لئے مارکیٹ سے باہر سڑک کو اپنا ٹھکانہ بنانے پر مجبور ہو جاتے ہیں ۔ اس کے علاوہ گاوں گاوں پھرنے والے جو بیوپاری ہوتے ہیں ان کی موٹر گاڑیاں بھی سڑک پر لگی رہتی ہیں اور کچھ بیوپاری تو موٹر گاڑیوں کو دکانوں کے طور پر استعمال کرتے ہوئے سڑک پر اپنا کاروبار چلاتے ہیں۔
ایسی حالت میں ایک طرف عوام کو خریداری کے لئے مارکیٹ تک جانے آنے میں تکلیف ہوتی ہے تو دوسری طرف اسی سڑک پر موجود سرکاری اسپتال تک جانے کا راستہ بھی بند ہو جاتا ہے ۔ دو پہیہ گاڑیوں تک کی آمد و رفت میں دشواری ہوتی ہے ۔ اسپتال جانے والوں کو شمس الدین سرکل سے ساگر روڈ کا راستہ اپنانا پڑتا ہے ۔ جبکہ اندرونی سڑک پر مرغیوں کی گاڑیاں، سوکھی مچھلی اور دوسرے چھوٹے موٹے بیوپاریوں کی دکانوں کا سلسلہ اتنا لمبا ہوتا ہے وہ انجمن کالج کراس سے آگے نکلتا ہوا نیشنل ہائی وے کے کنارے تک پہنچ جاتا ہے ۔ اس وجہ سے نیشنل ہائی وے کی ٹریفک بھی بری طرح متاثر ہوتی ہے ۔
سنڈے مارکیٹ کی موجودہ حالت کو دیکھتے ہوئے عوام مطالبہ کر رہے ہیں کہ پولیس اور دیگر بلدیہ کے افسران کو اس مسئلہ پر فوری توجہ دینی چاہیے اور سنڈے مارکیٹ کے بیوپاریوں اور کسانوں کو مارکیٹ کمپاونڈ کے اندر ہی محدود رکھنے کا انتظام کرنا چاہیے ۔ یا پھر اس مارکیٹ کو یہاں سے ہٹا کر کسی دوسرے وسیع میدان میں منتقل کرنا چاہیے جہاں بڑے پیمانے پر کسانوں اور بیوپاریوں کے لئے کاروبار کرنے کا موقع رہے اور وہاں ضروری بنیادی سہولتیں بھی فراہم ہوں ۔
