عوز بی ایم وائی ایف پرو کبڈی ٹورنامنٹ میں ٹیم بھائی جان کی شاندار جیت؛ کانٹے کی ٹکر میں پٹیل وارئیر کو فائنل میں دی تین پوائنٹ سے شکست
بھٹکل 16 مارچ (ایس او نیوز) بھٹکل مسلم یوتھ فیڈریشن کے زیر اہتمام منعقدہ عوز بی ایم وائی ایف پرو کبڈی ٹورنامنٹ میں ٹیم بھائی جان نے فائنل میں پٹیل وارئیر کو تین پوانٹوں سے زبردست شکست دیتے ہوئے شائقین کبڈی کو بے حد محظوظ کیا اور ٹرافی اپنے نام کرلیا۔ فائنل کا یہ مقابلہ بھٹکل تعلقہ اسٹڈیم المعروف وائی ایم ایس اے میدان میں پیر دیر رات کھیلا گیا جس میں ہزاروں کی تعداد میں شائقین نے شرکت کرتے ہوتے ہوئے میچس سے زبردست لطف اُٹھایا۔
فائنل مقابلے میں ابتداء سے ہی ایک اور دو پوائنٹ سے آگے چلنے والی پٹیل وارئیرس سکینڈ راونڈ کے ابتدائی مرحلے میں سات پوائنٹ تک آگے بڑھ گئی تھی اور لگ رہا تھا کہ پٹیل وارئیرس کی جیت یقینی ہے، ایک مرحلے میں پٹیل وارئیرس 22 اور بھائی جان کے 15 پوائنٹس تھے، پھر کھیل آگے بڑھنے لگا تو پٹیل وائیرس کے 27 اور بھائی جان کے 21 پوائنٹس بنے، ابھی میچ ختم ہونے کے لئے بمشکل پانچ منٹ باقی تھے کہ بھائی جان ٹیم کے اروند سدّی نے ایک ہی رائیڈ میں تین پوائنٹس حاصل کرتے ہوئے میچ کا نقشہ ہی بدل دیا۔ آخری پانچ منٹ کا اعلان ہوا تو دونوں ٹیموں کا اسکور34 تھا۔ اس کے بعد جب بھائی جان کی ٹیم کے بھاری بھرکم کھلاری اروند نے تقریباً ہر رائیڈ میں پوائنٹ یا پھر بونس پوائنٹس لینے کا سلسلہ شروع کیا تو پھر بھائی جان کے پوائنٹس ایک اور دو پوائنٹ سے آگے ہی نظر آنے لگے۔ آخری دو منٹ کے اعلان کے موقع پر بھائی جان کے 39 اورپٹیل وارئیرس کے 37 تھے، اور جب میچ کے ختم ہونے کا اعلان ہوا تو بھائی جان کا اسکور 41 اور پٹیل وارئیرس کے 38 تھے، جس کے ساتھ ہی بھائی جان نے نہایت سخت اور کڑے مقابلے میں تین پوائنٹوں سے جیت درج کرلی۔
ٹورنامنٹ جیتنے پر بھائی جان کو ٹرافی سمیت 75,000 روپیہ اور رنرز آپ ٹیم پٹیل وارئیرس کو ٹرافی سمیت 40000 روپیہ نقد انعام دیا گیا۔ ٹورنامنٹ میں تیسرا مقام پانے والی خلیفہ پلٹن اور چوتھا مقام پانے والی کے ایم ٹورس اینڈ ٹراویل ٹیم کو فی کس دس ہزار روپئے انعام مع ٹرافی سے نوازا گیا۔ خیال رہے کہ ٹورنامنٹ میں 12 ٹیمیں شریک تھیں۔ ایمباسی رائیڈرس کو بیسٹ ڈسپلین ٹیم کے اعزاز سے نوازا گیا۔ منڈگوڈ سے تعلق رکھنے والے بھائی جان ٹیم کے اروند سدّی کو مین آف دی فائنل، خلیفہ پلٹن کے ساحل امری کو بیسٹ کیچر اور پٹیل وارئیرس کے روی کو بیسٹ رائیڈر کے خطاب سے نوازا گیا۔پورے ٹورنامنٹ میں بہترین کھیل کا مظاہرہ پیش کرنے والے بھائی جان کے رتن کو پلئیر آف دی ٹورنامنٹ کے خطاب سے نوازا گیا۔
ٹورنامنٹ کے کئی ایک میچس کے دوران ایمپائروں کے بعض فیصلوں پر کھلاڑیوں کے اعتراضات کی وجہ سے کافی وقت ضائع ہوا اور تین دن کے اندر اختتام کو پہنچنے والا ٹورنامنٹ چوتھے دن رات دیر گئے اختتام کو پہنچا۔
ٹورنامنٹ بے حد دلچسپ اور کامیاب رہا اورنہایت خوش اسلوبی کے ساتھ اختتام کو پہنچا۔ ٹورنامنٹ کے تقریباً تمام مقابلے نہایت سخت رہے ۔ میچس میں ہندو مسلم بھائی چارگی کی بہترین مثال نظر آئی کیونکہ تقریباً تمام ٹیموں میں مسلم کھلاڑیوں کے ساتھ ساتھ غیرمسلم کھلاڑی بھی شامل تھے۔ موقع کی مناسبت سے پیام انسانیت اور فیڈریشن کا ایک مشترکہ ہندو مسلم گیٹ ٹوگیدر پروگرام کا بھی اہتمام کیا گیا جبکہ اہم بات یہ بھی رہی کہ ٹورنامنٹ کے موقع پر دبئی کے تاجر عتیق الرحمن مُنیری نے فیڈریشن کے نوجوانوں کی خدمات کا اعتراف کرتے ہوئے کم و بیش 15 لاکھ روپئے کی ایک ایمبولنس فیڈریشن کو عطیہ کی۔
یاد رہے کہ ساحل آن لائن یو ٹیوب چینل پر ٹورنامنٹ لائیو ٹیلی کاسٹ کیا گیا تھا، اس طرح میدان میں ہزاروں لوگوں کے ساتھ ساتھ آن لائن پر بھی ہزاروں لوگوں نے مقابلوں کا لطف اُٹھایا۔ اقبال پٹھان، سمیر مومن، محمدغوث، مرتضیٰ برماور اور ابراہیم شیخ کمٹہ نے باری باری کمنٹری کی ذمہ داری ادا کی۔ کھیل کی شفافیت کو باقی رکھنے کےلئے کرناٹکا کے مختلف شہروں سے قریب 20 ایمپائروں کی خدمات بھی حاصل کی گئی تھیں۔
بھٹکل مسلم یوتھ فیڈریشن کے صدر عزیز الرحمن رکن الدین ندوی کی صدارت میں منعقدہ ٹورنامنٹ کی اختتامی تقریب میں فیڈریشن کے نائب صدر انجم گنگاولی نے مہمانان کا استقبال کیا، اسپورٹس سکریٹری محمد طلحہ نے کلمہ تشکر پیش کیا، فیڈریشن کے سنئیر رکن مبشر حُسین ہلارے نے نظامت کی۔مہمان خصوصی کے طور پر بنگال وارئیر کبڈی کے کوچ اور ارجن اایوارڈ یافتہ بی سی رمیش، کرناٹکا کبڈی ریفری بورڈ کے چیرمین ایم شانموگم، کورونا وارئیر اور دبئی کے معروف تاجر عتیق الرحمن مُنیری، بنگال وارئیرس کبڈی کے ٹیم مینجر رئیس احمد، مرکزی خلیفہ جماعت المسلمین جنرل سکریٹری اسماعیل جوباپو، مجلس اصلاح و تنظیم بھٹکل کے صدر ایس ایم پرویز، بھٹکل ٹاون میونسپل چیف پرویز قاسمجی، سابق کرناٹکا کبڈی کھلاڑی عنایت اللہ شاہ بندری، بھٹکل مسلم یوتھ فیڈریشن کے سابق صدر امتیاز اُدیاور، سابق جنرل سکریٹری نصیف خلیفہ، فیڈریشن کے سماجی سکریٹری قیصر محتشم، تعلیمی کمیٹی عمران لنکا، نیشنل کبڈی کھلاڑی مہیش گوڈا، حفظ الرحمن برماور، فہد شاہ بندری، فواز شاہ بندری، ارشاد گوائی، بھٹکل اے سی ایف سدرشن اور ہوناور اے سی ایف بوریا سمیت کافی دیگر لوگ بھی موجود تھے۔
