بھٹکل میں دو روزہ حفظ قران مسابقہ آج سے شروع؛ ساحل آن لائن پر راست ٹیلی کاسٹ
بھٹکل 30/ مارچ (ایس او نیوز) بھٹکل نوائط کالونی تنظیم گرائونڈ پر آج جمعرات سے دو روزہ مسابقہ حفظ قران شروع ہوگیا ہے۔ یہ پروگرام جمعیۃ الحفاظ کی جانب سے آرگنائز کیا گیا ہے۔ دو روزہ پروگرام ساحل آن لائن پر راست ٹیلی کاسٹ کیا جارہا ہے۔
حافظ احمد ابن شاکر ماوڑ کی تلاوت کلام پاک سے پروگرام کا آغاز ہوا۔ حافظ اصغر صدیقی نے نعت پیش کی۔
مہمان خصوصی کے طور پر مولانا محمدزکریا سنبھلی ندوی جلوہ آفروز تھے۔ اسی طرح عرب مہمان الشیخ الدکتور عبدالرحیم محمد علی اور السید احمد نورائی بھی موجود تھے۔ بھٹکل جماعت المسلمین کے قاضی مولانا محمد اقبال مُلاندوی، قاضی مرکزی خلیفہ جماعت المسلمین مولانا خواجہ معین الدین اکرمی مدنی، جامعہ اسلامیہ کے ماسٹر محمد شفیع شاہ بندری، مہتمم جامعہ اسلامیہ مولانا مقبول کوبٹے ندوی سمیت کافی ذمہ داران اسٹیج پر تشریف فرما تھے۔
بھٹکل جامعہ مسجد کے خطیب اور پروگرام کے کنوینر مولانا عبدالعلیم خطیب ندوی نے استقبالیہ کلمات پیش کرتے ہوئے جمعیت الحفاظ کا تعارف پیش کیا۔ انہوں نے بتایاکہ قریب 22 سال پہلے اس تنظیم کا وجود عمل میں آیا تھا، مگر کچھ سالوں سے یہ تنظیم بے حد متحرک اور سرگرم ہوکر کام کررہی ہے۔ مولانا نے اس موقع پر قران کے حفظ کرنے کے تعلق سے خطاب کرتے ہوئے پروگرام کے تعلق سے بتایا کہ بھٹکل میں حفاظ کرام کے قران پاک کو مضبوط اور مستحکم کرنے کے لئے حفظ قران کے مقابلے رکھنے کا منصوبہ بنایا گیا تھا تاکہ حفظ کئے گئے قران کو پختہ کیاجائے ساتھ ساتھ حفاظ کرام آگے چل کر بڑے بڑےمقابلوں میں حصہ لے سکیں اور اُنہیں حوصلہ ملے، اس طرح کے مسابقوں سےقران بھی یاد رہے گا اور اُنہیں آگے بڑھنے کا بھی موقع ملے گا۔انہوں نے مزید بتایا کہ جمعت الحفاظ کا منصوبہ یہ ہے کہ ایک مقابلہ مقامی سطح پر رکھا جائے اور ایک مقابلہ ہندوستان گیر سطح پر منعقدہو۔مولانا نے بتایا کہ اس سے پہلے دوسال قبل نابینا حفاظ کے درمیان مقابلہ رکھا گیا تھا جو بے حد کامیاب رہا تھا۔اب جمعیت الحفاظ کی طرف سے یہ تیسرا مقابلہ منعقد کیا گیا ہے جو مقامی سطح کا ہے۔
پروگرام کی نظامت مولوی سمعان خلیفہ ندوی کررہے تھے۔ جبکہ حافظ مولانا نعمت اللہ عسکری ندوی پروگرام کی صدارت کررہےتھے۔
پروگرام فی الوقت جاری ہے، راست دیکھنے کےلئے مندرجہ ذیل لنک پر کلک کیا جاسکتا ہے: