ہبلی میں منعقدہ کرکٹ ٹورنامنٹ میں بھٹکل ٹیم کی زبردست کامیابی؛ ٹیم کی بھٹکل آمد پر شاندار استقبال
بھٹکل:11؍فروری (ایس او نیوز)کرناٹکااسٹیٹ کرکٹ اسوسی ایشن (KSCA) کے زیر اہتمام ہبلی میں منعقدہ چوتھے زونل لیول کرکٹ ٹورنامنٹ میں بھٹکل سی سی نے زبردست جیت حاصل کی ہے، اس جیت کے ساتھ ہی بھٹکل کے کرکٹ کھلاڑی کامیابی کے پہلے زینہ کو پارکرنے میں کامیاب ہوگئے ہیں ۔ جیت حاصل کرنے کے بعد جب ٹیم بھٹکل پہنچی تو مدینہ کالونی میں مجلس اصلاح و تنظیم کے جنرل سکریٹری محی الدین الطاف کھروری، بھٹکل مسلم یوتھ فیڈریشن کے صدر امتیاز اُدیاور، جنرل سکریٹری نصیف خلیفہ ،بھٹکل مسلم اسوسی ایشن کے سرگرم رکن اور ساحل آن لائن کے ڈائرکٹر محمد قمر سعدا سمیت کافی لوگوں نے ٹیم کا شاندار استقبال کیااور بھٹکل اسپورٹس اکیڈمی کے مینجنگ ڈائرکٹر وسیم کے ایم کی تہنیت کرتے ہوئے اُنہیں مبارکباد پیش کی۔ بھٹکل کرکٹ اکیڈمی کے دفتر میں بھٹکل کےاداروں کے ذمہ داران نے ٹیم کے تمام کھلاڑیوں کی بھی شال پوشی کرتے ہوئے اُن کی ہمت آفزائی کی۔
اب بھٹکل ٹیم نومبر ۔دسمبر میں ہبلی میں منعقد ہونے والے تھرڈ ڈیویژنل لیول کرکٹ ٹورنامنٹ کے لئے کولیفائی کرگئی ہے۔ وسیم نے ساحل آن لائن کو بتایا کہ بھٹکل ٹیم کو فی الحال پہلے مرحلے میں کامیابی ملی ہے، کھلاڑیوں کو آگے بڑھنے کے لئے ایسے تین مزید مرحلے طئے کرنے ہوں گے، جس کے بعد ہی کھلاڑیوں کو قومی ٹیم میں شامل ہونے کے مواقع مل سکتے ہیں۔
خیال رہے کہ ہبلی میں اتوار کو کھیلے گئے فائنل میچ میں بھٹکل کرکٹ ٹیم نے ہبلی کے تاناجی اسپورٹس اکیڈمی کوزبردست شکست دے کر چمپئین شپ جیت لی. بھٹکل سی سی نے ٹاس جیت کر پہلے بلے بازی کرتے ہوئے مقررہ 30اوورس میں 9وکٹ کھو کر 126رن بنائے تھے جس میں عوف اور اعجاز نے فی کس 22رن بنائے۔ ہبلی ٹیم کی طرف سے سوربھ نے 24رن دے کر 4وکٹ حاصل کئے۔ ہبلی ٹیم جب بیٹنگ کرنے آئی تو بھٹکل کے باولروں نے ہبلی کے بلے بازوں کو 23 ویں اوور میں صرف 74 رنوں پر ہی ڈھیر کردیا۔ اس طرح فائنل مقابلہ بھٹکل سی سی نے پچاس رنوں سے جیت لیا۔ بھٹکل کے محمد عارف نے 12رن دے کر 3وکٹ اور وسیم بیری نے 7رن دے کر 2وکٹ حاصل کئے ۔ ہبلی میں کھیلے گئے اس ٹورنامنٹ میں ریاست کے ہبلی زون میں آنے والے مختلف اضلاع کی کل 56ٹیموں نے حصہ لیا تھا۔
پہلے مرحلے میں زبردست کامیابی درج کرنے پر بھٹکل سی سی کو گلف ممالک سے بھی مبارکبادی کے پیغامات موصول ہورہے ہیں۔ وسیم کے ایم نے بتایا کہ دبئی کے معروف بزنس مین جناب عتیق الرحمن مُنیری ، بھٹکل مسلم جماعت کے سکریٹری جیلانی محتشم سمیت کافی لوگوں نے مبارکبادی کے پیغامات روانہ کئے ہیں۔وسیم نے بھٹکل مسلم یوتھ فیڈریشن کے ذمہ داران سمیت بھٹکل، منکی اور مرڈیشور کی ٹیموں کا شکریہ ادا کیا، ساتھ ساتھ اُن کے ساتھ تعاون کرنے والے نوائط کرکٹ کلب کے جناب مدثر ائیکری، جناب قمر سعدا، جناب نذیر قاسمجی، جناب صفیٰ کے ایم وغیرہ کا بھی بھرپور شکریہ ادا کیا۔ بتایا گیا ہے کہبھٹکل پہنچنے سے قبل منکی میں بھی بھٹکل سی سی کا شاندار استقبال ہوا۔
واضح رہے کہ جناب وسیم کے ایم بھٹکل میں کرکٹ اکیڈمی کےذریعے کھلاڑیوں کو کوچنگ فراہم کرنے کے ساتھ ساتھ اُنہیں کھیل کے میدان میں آگے بڑھانے کے لئے بھی کوشاں ہیں۔
اُمید کی جارہی ہے کہ بھٹکل مسلم یوتھ فیڈریشن کی طرف سے نوجوان کھلاڑیوں کی تربیت اور جناب وسیم کے ایم کی دلچسپی ، شوق اور ان کی محنت آئندہ دنوں میں بھٹکل کے کھلاڑیوں کو اچھے مواقع فراہم کرے گی اور اُنہیں ریاستی اور ملکی سطح پر چمکنے کا موقع ہاتھ آئے گا۔