دبئی:8/فروری    (ایس او نیوز) بیاریس کلچرل فورم (بی سی ایف)ٹرسٹ، یواے ای اور منگلورو کے زیرا ہتمام کرناٹکا کے سابق وزیر اعلیٰ ،جے ڈی ایس سیکولر کے صدر کمار سوامی،جے ڈی ایس کے جنر ل سکریٹری اور فضا گروپ آف کمپنی کے سی ایم ڈی ، بی ایم فاروق اور دیگر ذمہ داران  کی دبئی آمد کے موقع پر ان کے اعزاز میں تہنیتی پروگرام منعقد کیا گیا ۔

پروگرام میں سابق وزیر اعلیٰ کمار سوامی نے بیاریس کلچرل فورم کی ستائش کرتے ہوئے کہاکہ بی سی ایف اپنے طورپر سماج کی بہترین خدمات انجام دے  رہی ہے۔ انہوں نے  بی سی ایف کی وطن دوستی ، وطن پروری اور وطن سے لگاؤ کی کھل کر تعریف کرتے ہوئے کہاکہ اپنے ملک اور ریاست کی تہذیب کو ہر جگہ باقی رکھنےکے لئے کوشاں رہنا قابل مبارکباد ہے۔ بی سی ایف کو ہرطرح کا تعاون دینے کا تیقن دیتے ہوئے انہوںنے وعدہ کیا کہ مئی 2017کو گریٹ بال روم دبئی میں منعقد ہونے والے  ورلڈ کنڑیگاس کنونشن فار آرٹس اینڈ کلچر 2017میں شرکت کریں گے۔ کمار سوامی نے مسلمانوں کو تعلیمی میدان میں آگے لانے کے لئے کہاکہ کرناٹکا میں مسلم یونیورسٹی کے قیام کو لے کر کوشش کریں گے اور واضح کیا کہ یہ یونیورسٹی کسی مسلم ماہر تعلیمات اور دیگر دانشوروں کی نگرانی میں دی جائے گی۔ جے ڈی ایس کے جنرل سکریٹری بی ایم فاروق نے کمار سوامی کا تعارف پیش کرتےہوئے ان کے سکیولر کردار اور مسلمانوں کے تئیں کئے گئے کاموں کو پیش کیا۔ بی سی ایف کے جنرل سکریٹری ڈاکٹر کاپو محمد نے استقبال کرتے ہوئے ورلڈ کنڑیگاس کنونشن کے متعلق جانکاری دیتےہوئے بتایا کہ 1500سے زائد این آر ائیز شریک ہونے کی امید ظاہر کی۔ بی سی ایف کے نائب صدر ایم ای مولور نے بی سی ایف کا تعارف پیش کیا۔ اسی طرح نائب صدر لطیف ملکی نے بھی ادارے کےذریعے انجام دی جانے والی سرگرمیوں پر روشنی ڈالی۔ اس موقع پر بی سی ایف کی جانب سے سابق وزیرا علیٰ کمارسوامی اور دیگر ذمہ داران کی شال پوشی کرتے ہوئے تہنیت کی گئی ۔ پروگرام کا آغاز عبدالرحمن سجاپا کی تلاوت قرآن سے ہوا۔ افیق حسین نے شکریہ اداکیا۔