بھٹکل: تیز چلتی لاری کا ڈیزل ٹینک ہائی وے پرگرگیا؛ بڑا حادثہ ہوتے ہوتے ٹلا؛ ڈیزل سڑک پر بکھرنے سے موٹر بائکس پھسلنے لگی
بھٹکل 27 اکتوبر(ایس او نیوز) نیشنل ہائی وے پر تیزی سے دوڑتی ہوئی ایک لاری کا اچانک ڈیزل ٹینک نیچے گرگیا جس کے ساتھ ہی پورا ڈیزل سڑک پر بکھر گیا ، اس موقع پر لاری کے پیچھے سے آنے والی موٹر بائکس سڑک پر پھسل کر نیچے گرنے لگی۔ واردات جمعہ شب قریب ساڑھے آٹھ بجے، نوائط کالونی، سٹی لائٹ نیشنل ہائی وے پر پیش آئی۔
مچھلی کی خالی لاری غالباً شرالی الوے کوڑی بندر جارہی تھی، جہاں سے لاری پر مچھلیوں کا لوڈ لے کر گوا کے لئے نکلنے والی تھی، لیکن نوائط کالونی سے گذرنے کے دوران حادثہ پیش آیا۔
ایک عینی شاہد نے بتایا کہ تیزی کے ساتھ سڑک پر دوڑنے کے دوران پہلےلاری کے ٹینک کا ایک حصہ زمین کو چھونے لگا تو چنگاریاں اُٹھنے لگی، اس سے پہلے کہ ٹینک اور لاری آگ کے شعلے میں لپٹتی، پوری ٹینک ہی نیچے گرپڑی اورقسمت اچھی رہی کہ چنگاریاں شعلہ میں تبدیل ہونے سے پہلے ٹینک نیچے گرپڑی، ورنہ ڈیزل سے آگ پھیلنے میں دیر نہ لگتی۔ ٹینک نیچے گرنے کے بعد بھی لاری قریب پچاس میٹر دور جاکر ٹہری۔
قریب 200 لیٹر کی ڈیزل ٹینک غالباً بھری ہوئی تھی، ڈیزل جیسے ہی سڑک پر بکھرا، پیچھے سے آنے والی دوپہیوں والی سواریاں سڑک پر پھسلنے لگی، ایک کے بعد ایک تین بائک سڑک پر پھسلنے کے بعد عوام سڑک پر آگئے اور بیریکیڈ کی مدد سے سڑک کا ایک حصہ بند کرنے کی کوشش کی، پھر پولس جائےوقوع پر پہنچ گئی، جنہوں نے کچھ دیر کے لئے ہائی وے کے ایک حصے کو سواریوں کے لئے بند کردیا ۔ فوری طور پر فائر بریگیڈ بھی جائے وقوع پر پہنچ گئی۔ موٹر بائک کو نیچے گرنے سے محفوظ رکھنے کی غرض سے موقع پر موجود بعض سماجی کارکنوں نے فوری طور پر اپنے گھر سے ریت کی بوریاں لاکر سڑک پر پھیلاتے دیکھے گئے۔
بھٹکل سے تعلق رکھنے والے لاری کمپنی کے ایک اہلکار نے بتایا کہ اُسے سمجھ میں نہیں آرہا ہے کہ ڈیزل ٹینک آخر کیسے گرا۔ اس نے بتایا کہ لاری خالی تھی، لیکن آگے سے مچھلیاں لوڈ کرکے گوا کے لئے نکلنا تھا۔
