سرسی 28 / اکتوبر (ایس او نیوز) قدیم زمانے کے اصلی سونے کے سکّے فروخت کرنے کے نام پر نقلی سکّے تھما کر دھوکہ دینے والے ملزم کو پولیس نے گرفتار کرلیا ہے اور اس کے پاس سے 4.5 لاکھ روپے بازیافت کر لیے گئے ہیں۔
بتایا جاتا ہے کہ کوٹرپّا درگپّا کورچر (64 سال) نے کمٹہ کے ماروتی لنگپّا نائک اور سندر نارائن نائک سے رابطہ کرکے اپنے پاس سونے کے قدیم سکّے ہونے کی بات کہی اور نمونے کے طور پر ایک سونے کا سکہ ان کے حوالے کیا جسے سنار کے پاس جانچ کروانے پر اصلی سونے کا سکہ ثابت ہوا جس کی وجہ سے ان دونوں کو ملزم کوٹرپّا کی بات پر یقین آ گیا اور انہوں نے ملزم سے سکّے خریدنے کی خواہش ظاہر کی ۔
ملزم کوٹرپّا نے ماروتی اور سندر نائک کو سرسی تعلقہ کے داسن کوپّا کے پاس آنے کو کہا اور وہاں 4.5 لاکھ روپے میں سودا طے کرتے ہوئے اصلی سونے کے سکّے بتا کر نقلی سکّے انہیں تھما دئے ۔
اس سلسلے میں ماروتی لنگپّا نائک نے سرسی کے بنواسی پولیس تھانے میں شکایت درج کروائی تو پولیس نے تحقیقات کے بعد ملزم کوٹرپّا کو گرفتار کرنے کے ساتھ اس کے قبضے سے 4.5 لاکھ روپے بھی بازیافت کر لیے ۔