بھٹکل 5 مئی (ایس او نیوز)اُترکنڑا لوک سبھا حلقہ  کا سب سے بڑا اور سنگین مسئلہ اتی کرم کا ہے، یہاں کے زیادہ ترعلاقے جنگلات سے گھرے ہوئے  ہیں اوربہت زیادہ لوگ جنگلاتی زمین کو اتی کرم کرکے رہنے پر مجبورہیں، یہاں کے لوگ اگر مجھے اپنا ووٹ دے کر پارلیمنٹ بھیجتے ہیں تو میری اولین ترجیح اس مسئلہ کو حل کرنا ہوگی۔ ان باتوں کا اظہار اُترکنڑا لوک سبھا حلقہ کی کانگریسی اُمیدوار ڈاکٹر انجلی نمبالکر نے کیا۔ ساحل آن لائن سے گفتگو کرتے ہوئے انہوں نے بتایا  کہ اتی کرم داروں کے ایک لاکھ پچیس ہزار درخواستیں پینڈنگ پڑی ہوئی ہیں اور اس مسئلہ کی جلد یکسوئی ضروری ہے، میں چاہوں گی کہ پارلیمنٹ کے پہلے سیشن میں ہی میں اس مسئلہ کو اُٹھاوں گی۔

 ضلع میں چونکہ ایک بھی  سوپر اسپیشالٹی اسپتال نہیں ہیں اور ایمرجنسی کی صورت میں لوگوں کو اُڈپی، منی پال اور مینگلور سمیت گوا اور ہبلی اسپتالوں میں جانا پڑتا ہے،  اس لحاظ سے میر ی اولین ترجیحات میں  کمٹہ میں ایک سوپراسپیشالٹی اسپتال قائم کرنا  بھی ہے۔ نمبالکر نے بتایا کہ کرناٹک کے وزیراعلیٰ سدرامیا نے بھی کمٹہ میں  انتخابی پرچار کے دوران اس بات کا وعدہ کیا ہے کہ  کمٹہ میں ایک سوپر اسپشالٹی اسپتال قائم کرکے دیں گے۔ اس لئے مجھے اُمید ہے کہ کمٹہ چونکہ ضلع کے درمیان واقع ہے اس لئے یہاں اسپتال کے قیام سے پورے ضلع کےعوام مستفید ہوسکیں گے۔

ڈاکٹر نمبالکر نے کہا کہ اس کے ساتھ ہی ضلع کے دیگر مسائل کی طرف بھی میں توجہ دوں گی ، خاص کر کائیگا  اور سی برڈ پروجکٹ ضلع میں  چل رہے ہیں تو میں چاہوں گی کہ مقامی لوگوں کو یہاں روزگار ملے۔ نیشنل ہائی وے کا ادھے ادھورے کام کو  مکمل کرنے کی طرف  توجہ دینا بھی  میری  ترجیحات میں شامل ہے، انہوں نے بتایا کہ ہائی وے کا کام مکمل نہ ہونے کی وجہ سے  بہت  سارے سڑک حادثات ہورہے ہیں اور لوگوں کو اپنی جانیں گنوانی پڑرہی ہیں۔ انہوں نے واضح کیا کہ مختلف علاقوں میں کئے گئے دوروں اور مختلف  لوگوں سے ملاقاتوں کے بعد   اُن کےسامنے قریب دس مسائل ایسے  ہیں جس کو وہ جلد سے جلد  حل کرنے کی طرف توجہ دیں گی۔

ڈاکٹر نمبالکر نے بتایا کہ اُترکنڑا میں سیاحت کو ترقی دینا بھی ضروری ہے، پڑوس میں  ہی چونکہ نہ صرف  نیشنل بلکہ انٹرنیشنل سطح پر مشہور گوا کے بیچس ہیں، ایسے میں یہاں بھی سیاحت کو بہت زیادہ فروغ دیا جاسکتا ہے اور مقامی لوگوں کے لئے  روزگار کے مواقع پیدا کئے جاسکتے ہیں،   لیکن اس کے لئے مجھے تھوڑا  مطالعہ کرنا پڑے گا ۔ میں چاہوں گی کہ  اُترکنڑا کے بیچس کو بھی  نہ صرف نیشنل لیول پر بلکہ انٹرنیشنل لیول پر  خوبصورت بنائیں جائیں اور  سیاحوں کو راغب کرنے کی پوری کوشش کی جائے۔

یاد رہے کہ اُترکنڑا لوک سبھا  حلقہ میں 7/ مئی کو انتخابات ہوں گے۔