ہبلی : وزیر اعظم نریندرا مودی نے کیا 26 ویں نیشنل یوتھ فیسٹیول کا افتتاح
ہبلی 13 / جنوری (ایس او نیوز) وزیر اعظم نریندرا مودی نے شہر کے کیشوا پورا میں ریلوے میدان میں 26 ویں نیشنل یوتھ فیسٹیول 2023 کا افتتاح کیا ۔ 12 جنوری سے 16 جنوری تک چلنے والے اس پانچ روزہ فیسٹیول کا شلوگن "ترقی یافتہ نوجوان - ترقی یافتہ دیش" ہے جس میں ملک کی مختلف ریاستوں سے نوجوانوں کی ٹیمیں شرکت کر رہی ہیں ۔
وزیر اعظم نے فیسٹیول کا افتتاح کرتے ہوئے کہا کہ ڈیجیٹل انڈیا کے اس دور میں صلاحیتوں سے بھرپور نوجوانوں کے لئے بہترین مواقع اپنا دروازہ کھولے کھڑے ہیں ۔ اس لئے نوجوانوں کو چاہیے کہ 'اٹھو، آگے بڑھو اور منزل پانے تک قدم مت روکو' والے سوامی ویویکانندا کے منتر پر عمل کرتے ہوئے ملک کو ترقی کی بلندیوں تک لے جانے کے لئے متحد ہونا چاہیے ۔
انہوں نے کہا کہ کرناٹکا کے ساتھ سوامی ویویکانندا کا خاص تعلق رہا ہے ۔ میسور کے مہا راجہ نے انہیں شیکاگو کانفرنس میں شرکت جانے کے لئے سہولتیں فراہم کی تھیں ۔ رانی چینمّا، سنگولی رائینّا، وشویشوریا جیسی عظیم ہستیوں کا حوالہ دیتے ہوئے انہوں نے نوجوانوں کو ملک کی ترقی میں شامل ہونے کی آواز دی ۔
وزیر اعظم نے کہا کہ بھارت معیشت کے اعتبار سے اس وقت دنیا میں پانچویں مقام پر کھڑا ہے ، اسے تیسرے مقام پر لانے کا نشانہ ہم نے طے کیا ہے ۔ زرعی لحاظ سے بھی ہمارا ملک دنیا میں بہت آگے ہے ۔ اس میں ٹیکنالوجی کے استعمال سے نوجوانوں کے لئے بہت زیادہ مواقع ملنے والے ہیں ۔
انہوں نے کہا کہ ملک کے الگ الگ مقامات سے نوجوانوں کی ٹیمیں مقابلوں میں حصہ لینے کے لئے یہاں پہنچی ہیں ۔ ان مقابلوں میں چاہے جو بھی تیم جیتے ، مگر آخر یہ جیت تو بھارت کی ہی جیت ہوتی ہے ۔
وزیر اعظم جب ایئر پورٹ سے روڈ شو کرتے ہوئے ریلوے میدان کی طرف جا رہے تھے تو اس دوران سڑک کنارے سے بیریکیڈ پھلانگ کر ایک 10 سالہ نوجوان وزیر اعظم کو پھولوں کا ہار پہنانے کے لئے آگے بڑھا ۔ سیکیوریٹی والوں نے اسے دبوچ لیا مگر وزیر اعظم نے خود ہی مداخلت کرتے ہوئے اس لڑکے کو ہار پہنانے کے لئے موقع فراہم کیا ۔
اس موقع پر ایک ریلی نکالی گئی جس میں مختلف ثقافتی جھلکیوں، یوگا آسن ، اسپورٹس اور پوشاکوں کے ساتھ ملک کی دیگر ریاستوں سے آنے والے وفود نے حصہ لیا ۔