بھٹکل ، 15؍ مارچ (ایس او نیوز) مدینہ ویلفئیر سوسائٹی کی جانب سے منعقد ہونے والے  ٹی 10 بلاسٹ کرکٹ ٹورنامنٹ میں  بھٹکل کی اسداللہ ٹیم  نے این ایس اے منکی کو ایک کڑے مقابلے میں شکست دے کر ٹرافی کو اپنے نام کرلیا۔  

اتوار کو کھیلے گئے فائنل مقابلے میں پڑوسی ہوناور تعلقہ کے منکی قصبہ کی مضبوط سمجھی جانے والی این ایس اے منکی نے ٹوس جیت کر بھٹکل کی معروف ٹیم اسداللہ کو پہلے بلے بازی کی دعوت دی اور اسداللہ کی طرف سے اسجد حیدر نے بلہ سنبھالتے ہوئے منکی کے باؤلروں کی دھنائی شروع کردی انہوں نے صرف 12 گیندوں میں2 چوکوں اور 5 چھکوں کی  مددسے دھواں دار  41 رن اسکور کرڈالے دوسری طرف اطفان نے 7 گیندوں میں 2 چھکوں اور 1چوکے کی مدد سے   21 رن بناکر اسداللہ کو مضبوط پوزیشن میں پہنچانے میں اہم رول ادا کیا۔ این ایس اے منکی کی طرف سے گیند بازی میں  فیصل شیخ نے 20 رن دے کر 3 وکٹیں اور سلمان حسن باپو نے 14 رن دے کر 2 وکٹیں  حاصل کیں ۔ اس طرح اسداللہ نے مقررہ صرف دس اووروں میں پانچ وکٹوں کے نقصان پر 135 رنوں کا پہاڑ کھڑا کردیا۔

این ایس اے منکی نے جیت کے لئے درکار 136 رنوں کا پیچھا اسی برق رفتاری سے کرنے کی کوشش کی۔ بالخصوص حذیفہ قادرہ نے محض  33 گیندوں میں 88 رنوں کی شاندار پاری کھیلتے ہوئے ایک مرحلے میں اسداللہ کے کھلاڑیوں کو دن میں تارے دکھادئیے۔ انہوں نے اپنی تیز رفتار اننگز میں 12 چھکے لگائے۔ مگر ان کو دیگر کھلاڑیوں کا ساتھ نہ مل سکا جسکے نتیجے میں ان کی ٹیم اسداللہ سے صرف گیارہ رنوں سے پچھڑھ گئی۔ اسداللہ کے صفوان نے 13 رن دے کر 2 وکٹیں جبکہ اسجد حیدر  اور اطفان نے ایک ، ایک  وکٹ حاصل کی  ۔ اس طرح اسداللہ نے  فائنل مقابلہ 11 رنوں سے جیت لیا۔

شاندار کھیل کا مظاہرہ پیش کرنے میں کامیاب اسداللہ کو ٹورنامنٹ جیتنے پر 33٫333 روپیہ مع ٹرافی سے نوازا گیا۔ جبکہ ٹورنامنٹ میں دوسرا مقام پانے والی این ایس اے منکی کو17٫999 روپیہ مع ٹرافی دی گئی جس کے ساتھ ہی 20 فروری سے جاری ٹورنامنٹ کامیابی کے ساتھ اختتام کو پہنچا۔

اسداللہ کے اسجد حیدر کو اُن کی بہترین بلے بازی اور گیند بازی کے لئے مین آف دی میچ کے اعزاز سے نوازا گیا۔

ٹورنامنٹ میں  33 ٹیموں نے حصہ لیا تھا ۔ جس میں اسدااللہ نے سیمی فائنل میں نور اسپورٹس کو اور این ایس اے منکی نے آر ایس اے منکی کو شکست دے کر فائنل میں جگہ بنائی تھی۔ 

ٹورنامنٹ میں  این ایس اے منکی کے حذیفہ قادرہ نے  پانچ میچوں میں شاندار 291 رن بنائے جس کی بنیاد پر انہیں پلیئر آف دی ٹورنامنٹ کے  اعزاز سے نوازا گیا۔ این ایس اے منکی کے ہی سیف حاجیکا نے  پانچ میچوں میں 7 وکٹیں حاصل کرنے میں کامیاب رہے جس کی بنیاد پر انہیں بیسٹ باولر کے اعزاز سے نوازا گیا۔ الجامعہ کے صواف نے  چار میچوں میں  شاندار بلے بازی کرتے ہوئے تین نصف سنچریوں  سمیت 237  رن بنائے۔ جس کی بنیاد پر انہیں بیسٹ بیٹسمین کا خطاب دیا گیا۔  سوپر اسٹار کے عبدالباقی کو  فاسٹ ففٹی اور الفلاح کے احمد ڈاٹا نے تیز رفتار سنچری بنانے کا اعزاز حاصل کیا، اسی طرح  زیادہ چھکے لگانے والے بلے باز کا اعزاز منکی کے حذیفہ قادرہ نے حاصل کیا۔ مدینہ کے موسیٰ کو ایمرجنگ پلئیر اور بھٹکل کی ای سی بی ٹیم کو بیسٹ ڈسپلن ٹیم  کے اعزاز سے نوازا گیا ۔

فائنل تقریب کا آغاز میزیان موٹیا کی تلاوتِ کلام پاک سے ہوا۔ رافع گنگاولی نے مدینہ کا تعارف پیش کیا۔فائنل تقریب میں کینرا مسلم خلیج کونسل کے جنرل سکریٹری ابو احمد مختصر مہمان خصوصی کے طور پر تشریف فرما تھے۔  بھٹکل مسلم یوتھ فیڈریشن کے اسپورٹس سکریٹری طلحہ سمیت کافی دیگر ذمہ داران اور کھلاڑی بھی موجود تھے۔ بھٹکل ایم اے ایل سنیل نائک نے تقریب کی صدارت کی۔