بھٹکل 27/ اکتوبر (ایس او نیوز) بھٹکل میں ڈینگی پر قابو پانے کے لئے ایک طرف شہر کے مختلف علاقوں میں مچھروں کو بھگانے کے لئے فوگنگ کی جارہی ہے وہیں مچھروں کی افزائش کو روکنے کے لئے بھی اقدامات تیز کردئے گئے ہیں۔ اس تعلق سے جمعہ کو کاروار سے محکمہ انڈر گراونڈ ڈرینیج کے ایکزی کوٹیو انجینر نے غوثیہ اسٹریٹ پہنچ کر پمپنگ اسٹیشن کا جائزہ لیا۔ اور یہاں کے ویٹ ویل سے ندی میں پانی چھوڑے جانے سے روکنے کی تدابیر پرغور کیا۔
غوثیہ اسٹریٹ، جہاں سے ڈرینیج کا گندہ پانی کنووں میں داخل ہورہا ہے اور کنووں میں ڈرینیج کے گندے پانی کو داخل ہونے سے روکنےکے لئے قریبی شرابی ندی میں چھوڑا جاتا ہے اسی کے نتیجے میں مچھروں کی افزائش ہونے کے امکانات ظاہر کئے جارہے ہیں وہیں پوری ندی آلودہ ہونے سے ندی سے متصل تمام علاقوں میں مختلف قسم کی بیماریاں پھیلنےکے بھی پورے امکانات ظاہر کئے گئے ہیں۔ اس طرح کے حالات کو دیکھتے ہوئے تعلقہ انتظامیہ اب پورا زور اس بات پر لگارہا ہے کہ ڈرینیج کے گندے پانی کو کسی بھی حال میں ندی میں چھوڑے جانے سے روکا جائے اوربیماریوں کو مزید پھیلنے نہ دیں۔
یاد رہے کہ جمعرات کومیونسپالٹی میں منعقدہ میٹنگ میں اسسٹنٹ کمشنر نے میونسپل چیف آفسر کو ہدایت دی تھی کہ وہ کاروار میں موجود یوجی ڈی ایکزی کوٹیو انجینر کو موجودہ حالات سے اگاہ کرتے ہوئے اس کے تدارک کی طرف توجہ دلائے اوربھٹکل میں ہوئے یو جی ڈی کاموں کی رپورٹ دو دن کے اندر منگوائے۔ اس ضمن میں میونسپل چیف افسر نیل کنٹھ میستا نے بتایا کہ ان کی طرف سے تحریری درخواست یو جی ڈی ایکزی کوٹیو انجینر کو دی جاچکی ہے۔