آن لائن تدریس یا ای تعلیم : ملک میں 56فی صدطلبا اسمارٹ فون کی سہولیات سے محروم : این جی اؤ کےذریعے 42ہزار سے زائد طلبا کا سروے
نئی دہلی:13؍جون (ایس اؤ نیوز)آن لائن تعلیم یا آن لائن کلاسوں میں شریک ہونےکے لئے طلبا کے پا س بنیادی طورپر ضروری ’اسمارٹ فون‘ ملک کے 56فی صد بچوں کے پاس نہیں ہونے کا سروے کے ذریعے پتہ چلا ہے۔ مختلف اسکولی مرحلوں کے 42381طلبا سروے میں شریک ہوئے تھے۔
بچوں کے حقوق کے لئے جدوجہد کرنے والی تنظیم ’اسمائل فاؤنڈیشن ‘ نے ’کووڈ-19کی تصویر: حقیقت ِ حال اور حل‘ کے موضوع پر سروے کیا ہے۔ سروے کے مطابق سروے میں شریک ہوئے طلبا میں سے 43.99فی صد بچوں کے پاس اسمارٹ فون ہے تو بقیہ اتنی ہی فی صد طلبا کے پاس بیسک فیچر فون ہے۔ جب کہ 12.02فی صد بچوں کے پاس کسی طرح کا کوئی فون نہیں ہے۔ 56.01فی صد طلبا کو اسمارٹ فون کی سہولیات میسر نہیں ہونے کی جانکاری سروے سے ملی ہے۔ اسی طرح 68.99طلبا ٹیلی ویژن کی سہولیات رکھتے ہیں تو بقیہ 31.01بچوں کے پاس سہولیات نہیں ہیں۔
سروے میں پرائمری زمرے (پانچویں جماعت تک )کے 19576طلبا،وسطی زمرے کے (6،7،8جماعت)کے 12277 طلبا سروے میں شریک ہوئے تھے۔ اسی طرح ہائی اسکول 9اور10ویں جماعت کے 5537اور 11اور12کلاس کے 3216 طلبا نے سروے کے متعلق اپنی آراء کا اظہار کیا تھا۔
سروے دو طریقوں سے کیاگیا تھا۔ این جی اؤ نے اپنے پاس موجود معلومات کی بنیاد پر ٹیلی فون کے ذریعے جانکاری حاصل کی تو دوسرے مرحلے میں کارکنان گھر گھر پہنچ کر سوال جواب کی صورت میں جانکاری لی تھی۔ کرناٹکا سمیت ملک کی 23ریاستوں میں 16اپریل سے 28اپریل تک یعنی کل 12دنوں تک یہ سروے کیاگیا ہے۔ مصدقہ اعداد وشمارات کے مطابق ملک میں کل 35کروڑ طلبا ہیں ۔ ان میں سے کتنے طلبا اپنے پاس ڈیجٹیل اشیاء اور انٹرنیٹ کی سہولیات رکھتے ہیں کوئی جانکاری نہیں ہے۔