شمالی کینرا سے مشترکہ امیدوارآنند اسنوٹیکر نے داخل کیا پرچہ نامزدگی : مودی پر پلٹ وار کرتے ہوئے کماراسوامی نے کہا،13علاقائی پارٹیوں کے ساتھ مودی بھی کررہے ہیں انتخابات کا سامنا
کاروار:04؍اپریل (ایس او نیوز)علاقائی سیاسی پارٹیوں کو ’کچڑی ‘ کہہ کر مذاق اڑانے والے وزیر اعظم نریندر مودی خود 13 علاقائی سیاسی پارٹیوں کے ساتھ انتخابات کا سامنا کررہےہیں۔ اور راستے میں کھڑے ہوکر چار لوگ مودی مودی کہہ کر چیخ پکار کررہے ہیں۔ صرف مودی مودی کہہ چلانے سے نہیں ہوگا، عوام کے اندر اب شعور آچکا ہے اور وہ مودی کے کئے گئے جھوٹے وعدوں پر غور کررہے ہیں اس لئے اس مرتبہ بی جےپی کواقتدار نہیں ملےگا۔ ان خیالات کا اظہار کرناٹکا کے وزیر اعلی ٰ کمارسوامی نے کیا۔
جمعرات کو کاروار میں شمالی کینرا کے کانگریس ۔ جے ڈی ایس مشترکہ امیدوار آنند اسنوٹیکر کے پرچہ نامزدگی داخل کرنے سے پہلے منعقدہ پروگرام میں وزیر اعلیٰ کمار سوامی نے بی جے پی اور وزیراعظم مودی پر کڑی تنقید کی اور اُترکنڑا کے بی جے پی امیدوار اننت کمار ہیگڈے پر سخت حملہ کرتے ہوئے کہاکہ اترکنڑا لوک سبھا حلقہ کے ایم پی اننت کمار ہیگڈے کے بیانات کو سنیں تو آپ جان سکتےہیں کہ ان کی تہذیب کیسی ہے۔ ہندو سنسکرتی کے محافظ کاڈھونگ رچا کر غیر مہذب الفاظ کا استعمال کرتے ہیں۔ غیر مہذب لوگ بھی ایسے الفاظ استعمال نہیں کرتے ۔ ملک کے سب سے آخری آدمی کو تحفظ دینے والے دستور ی نظام کی جڑوں کو کمزور کرنےو الے ہٹ دھرمی کے بیانات دیتے ہیں، انہوں نے عوام سے سوال کیا کہ آخر 5مرتبہ منتخب ہونےو الے ایم پی نے اترکنڑا ضلع کو دیا کیا ہے؟ ۔
انہوں نے بی جے پی لیڈران کی سیاست پر کڑی تنقید کرتے ہوئے کہاکہ ودھان سبھا انتخابات سے پہلے ساحلی پٹی پر پسماندہ طبقہ کے ایک نوجوان کی مشتبہ حالت میں لاش برآمد ہوئی ، کماراسوامی نے پوچھا کہ آخر اس کی موت کے پیچھے کیا راز چھپاہے؟ کماراسوامی نے کہا کہ پسماندہ طبقہ کے ایک نوجوان کی قربانی دے کر بی جے پی لیڈران ، پسماندہ طبقات کے نوجوانوں کو سامنے پیش کرکے اپنی سیاسی روٹیاں سینک رہے ہیں اور عوام کو بے وقوف بناکر ووٹ حاصل کررہے ہیں ۔
وزیراعلیٰ نے ضلعی عوام سے معافی مانگتے ہوئے کہاکہ انہوں نے ودھان سبھا انتخابات کے دوران بیان دیتےہوئے کہاتھا کہ پارٹی اگر اقتدار میں آتی ہے تو وہ دومہینوں تک ضلع میں قیام کرکے فاریسٹ اتی کرم کا مسئلہ حل کریں گے۔ لیکن ایسا نہیں کرسکا، انہوں نے اس کی وجہ بی جےپی لیڈران کو قرار دیا جو کھل کر مخلوط حکومت کو کا م کرنےکا موقع نہیں دے رہے ہیں۔
مشترکہ امیدوار آنند اسنوٹیکر کے پرچہ نامزدگی کے وقت کانگریس کے ودھان پریشد ممبر گھوٹنیکر، کانگریس ضلعی صدر بھیمنا نائک اور بھٹکل جے ڈی ایس لیڈر عنایت اللہ شاہ بندری موجود تھے۔